TAGBILARAN CITY, September 1 (PIA)–Gipaabot nga padayong makasinati og mga pag-uwan ang pipila ka parte sa Pilipinas ning pagsulod sa buwan sa Setyembre.
Matud pa sa Philippine Atmospheric, Geophysical and Astronomical Services Administration (PAGASA), duha hangtud sa upat ka bagyo ang gipaabot nga maumol ug mosulod sa Philippine Area of Responsibility (PAR) ning bulana.
Base sa rainfall outlook map sa PAGASA alang sa buwan sa Setyembre, pipila ka lugar pa sa nasod ang makasinati og above normal rainfall samtang ang ubang parte sama sa Davao region makasinati usab og below normal rainfall.
Gibanabanang naa sa 55 hangtud 60 porsiyento ang tsansa sa pag-igo sa La Niña phenomenon sa nasod.
Samtang hingpit nang nahimong bagyo ang low pressure nga nasiplatan sa parte sa Batanes ug gihinganlan kining ‘Enteng’ nga magdala og hinay hangtud sa kusog nga pag-ulan. (ecb/PIA7-Bohol)
