TAGBILARAN CITY, September 2 (PIA)–Gilusad na sa Philippine Postal Corporation ang ilang gipalig-on nga privilege card diin ang mga nagkupot niining Postal ID kinahanglan lamang nga ipakita kini sa mga ka-partner nga establisimyento sa PHLPost ug mahimo na silang makakuha og mga diskuwento ug uban pang ipanghatag.
Ang maong privilege program parte sa gisaad sa PHLPost nga pagpa-usbaw sa standards sa mga ID nga gi-isyu sa gobyerno pinaagi sa paghiusa sa mga kliyente niini ug sa nagkalain-laing ka-partner nga establisimyento sa korporas¬yon aron mapanalipdan ang kailhanan sa mga kliyente ug aron malikayan ang mga pekeng transaksiyon
Ang maong Postal ID aduna na usab pisikal ug biometrics-based security features mao nga kini na karon ang pinaka-secure ug pinakadali nga makuhang ID gikan sa gobyerno.
Makakuha og diskwentong 10% sa admission fee ug encounter programs sa Ocean Adventure, 10% nga diskwento sa Superior o Deluxe Room sa Camayan Beach Resort and Hotel, P1.00 nga kida sa matag litro sa gasolina o diesel gikan sa Flying V, 10-15% nga diskwento gikan sa Derm Magic, Fresh Salon and Spa, Fresh Touch Spa ug uban pa.
Mahimong mo-apply alang sa bag-ong gipalig-on nga Postal ID ang mga Pilipino ug langyaw nga namuyo sa nasod bisan unsa ang pangedaron o propesyon.
Ang mga application forms makuha bisan asa sa 1,300 ka post office sa tibuok nasod ug mahimo usab kini ma-download gikan sa postalidph.com o phlpost.gov.ph.
Alang sa dugang mga detalye kun asa ug unsaon paggamit ang mga pribilehiyong kauban sa gipalig-ong Postal ID, bisitaha lamang ang Postal ID website (www.postalidph.com) ug ang mga social media accounts sa Facebook (newpostalid), Twitter (@PostaLiD) ug sa Instagram. (ecb/PIA7-Bohol)
