MANILA, October 10 (PIA)–Gipaabot nga karong bulana na malagdaan ni Presidente Rodrigo Duterte ang usa ka executive order (EO) nga magdili na sa pagpanigarilyo sa tibuok nasod.
Matud pa ni Department of Health (DOH) Kalihim Paulyn Ubial, himuong 100 percent smoke-free ang tanang pampublikong mga lugar sa tibuok nasod ubos sa maong executive order.
Tuyo usab niining hatagan og mas hugot nga suporta ang sa pag-amyenda sa Kongreso sa Tobacco Regulation Act of 2003 o Republic Act 9211.
Nakalatid man sa Section 5 sa maong balaod ang Smoking Ban in Public Places, apan tuyo sa mga magbabalaod nga mas hugtan pa ang pagpatuman niini.
Sa pagkakaron, giingong makuti pa nilang gisusi ang pag-amyenda sa RA 9211 tungod sa daghang isyu ug gray areas niini, apil na ang pagbutang og mga smoking areas ug point-of-sale advertisements.
Ang maong EO nga gipaabot nga lagdaan na karong bulan sa Oktubre mahimong susama sa kasamtangang gipatuman na sa syudad sa Davao diin namuno isip mayor si Presidente Duterte kaniadto. (ecb/PIA7-Bohol)
