MANILA, October 14 (PIA)–Nagpagawas na og kamanduan si Presidente Rodrigo Duterte alang sa pagmugna og Presidential Task Force on the Violation of the Rights of the Media nga nahisulod sa Administrative Order (AO) 1.
Matud pa ni Presidential Communications Office (PCO) Kalihim Martin Andanar, tuyo niining protektahan ang katungod sa mga mamahayag agi og pagsunod sa probisyon sa Batakang Balaod kalabot sa Freedom of the Press.
Dugang pa ni Andanar, seryoso gayud ang Presidente nga sulbaron ang problema sa media killing. Kini usab aron masiguro ang seguridad sa mga mamamahayag sa nasod.
Gipahayag ni Andanar nga tungod sa mga nahitabong media killings, napalinya ang Pilipinas nga usa sa mga nasod sa kalibotan nga giingong delikado alang sa pagpatuman sa katungdanan sa mga mamamahayag.
Gitudlong chairman sa task force si Justice Secretary Vitaliano Aguirre samtang moalagad isip co-chairman si Andanar.
Gilagdaan sa Presidente ang AO niadtong Oktubre 11.
Gitataw usab ni Andanar nga online man o ‘on ground ang harrassment’, mahimong motaho sa presidential task force tungod kay tataw nga pagpanglapas kini sa life security ug kagawasan sa usa ka mamamahayag. (ecb/PIA7-Bohol)
