MANILA, October 27 (PIA)–Gilagdaan na ni Presidente Rodrigo Duterte ang executive order nga nag-reorganisa sa mga cabinet cluster.
Pinaagi sa Executive Order No. 7 nga gilagdaan sa Presidente niadtong Oktubre 14, 2016, gi-reorganisa niini ang gabinete sa lima ka cluster: ang good governance and anti-corruption; human development and poverty reduction; economic development; security justice and peace; ug climate change and mitigation.
Ubos sa E.O number 7, ang security, justice and peace cluster nga kanhi gipamunoan sa Executive Secretary pangunahan na karon sa Kalihim sa Department of National Defense (DND) sa tumong nga masiguro nga mapatuman ang mandato sa gobyerno nga pugngan ang lawless violence ug ipadaug ang kampanya batok sa krimen ilabi na sa ginadili nga droga ug korapsiyon.
Mahimong miyembro sa maong cluster ang Executive Secretary, Cabinet Secretary, ang Kalihim sa Department of Interior and Local Government (DILG), Department of Justice (DOJ), Department of Foreign Affairs (DFA), ang National Security Adviser, Presidential Adviser on the Peace Process ug ang National Security Council isip Secretariat.
Gi-amyendahan niini ang Executive Order No. 43 nga gipatuman ni kanhi Presidente Benigno Aquino III niadtong tuig 2011. (ecb/PIA7-Bohol)
