MANILA, October 28 (PIA)–Mokabat sa 19 ka bilyong dolyar sa mga loans ug investments ang gidala paule ni Presidente Rodirgo Duterte sa iyang pagbalik gikan sa tulo ka adlaw nga pagbisita sa Japan.
Dakong parte niini o naa sa $17.2 bilyon ang gitanyag sa Pilipinas sa Marubeni Corp., usa sa pinakadakong integrated trading ug investment business conglomerate sa Japan.
Pagpalig-on sa ekonomiya, maritime ug air capabilities ang pipila lamang sa produktibong nahisgotan ni Presidente Duterte ug Japanese Prime Minister Shinzo Abe sa maong pagbisita niya sa maong nasod.
Sa iyang mensahe sa pag-abot sa Davao International Airport (DIA), miingon ang Presidente nga dako ang matabang sa Japan sa maritime ug air capabilties sa Pilipinas.
Gihulagway pa sa Presidente nga “excellent” ang relasyon sa Pilipinas ug Japan.
Human sa iyang pakigpulong kang Abe, nanawagan si Presidente Duterte sa mga private business sa Japan nga mamuhonan pa sa ilang negosyo sa Pilipinas.
Gipasigarbo usab ni Duterte ang mga natabang sa mga Hapon sa Pilipinas ilabi na ang pagpatuman sa mga proyekto ubos sa Japan International Cooperation Agency (JICA) ug usa sa giingong mga nag-unang partner sa nasod ang Overseas Development Assistance (ODA).
Gibarugan usab ni Presidente Duterte nga magpabiling suod nga higala ang Japan ug Pilipinas. (ecb/PIA7-Bohol)
