DILI na kapugngan ang pagtaas sa pletehan, kini matud ni Land Transportation Franchising and Regulatory board (LTFRB) chairman Thompson Lantion.
Matud ni Lantion, human mabati ug matuki ang tagsa-tagsa ka mga posisyon sa dagkong pundok sa transport sa nasud, hayan ilang irekomendar ang gipangayo sa mga taxi, jeepney, ug bus, ngadto sa National Economic Development Authority (NEDA).
Kahinumduman nga sukad gihatag sa LTFRB ang katapusang usbaw sa pletehan niadtong 2003, makadaghan na nga misaka ang bili sa gasolina nga nakapa-alkanse sa mga tigdumala sa mga sakyanang nagsilbe sa publiko.
Hinuon, butyag ni Lantion, hayan sa katapusang semana sa Hulyo o sa sayong Agosto na mapatuman ang hangyo sa mga drivers kay magmugna pa ang LTFRB sa mga sumbanan kabahin niini.
Gipangayo na ang dugang P10 nga flagdown rate sa mga taxi samtang anaa sa P4-5 ang unang gisugyot nga pletehan sa PISTON.
Kini nagpasabot nga ibabaw sa P7 nga pletehan sa unang upat ka kilometro, mokabat na ngadto sa P11-12, kana kon aprobahan sa LTFRB.
Gipadayag usab sa National Council for Commuter Protection nga dili man sila supak sa gipangayo nga usbaw sa pletehan dala sa mahal nga gasolina, pinaagi sailang pamuno nga si Elvina Medina nga kinahanglan usab nga kahatagan sa tukmang batakan ang mga driver aron malikayan ang pag-pang-abuso. (rachiu/PIA)
