Ang administrasyon ni Presidente Gloria Macapagal-Arroyo mobilin sa kinatibuk-ang 51 ka mga RORO nga pantalan sa iyang pagbiya sa pangatungdanan sa tuig 2010.
Mao kini ang gibutyag ni Presidente Arroyo sa iyang 2008 State of the Nation Address kon SONA nga sa 39 ka mga RORO nga pantalan nga natukod, lain pang usa ka dosena ang pagatukoron sa sunod duha ka tuig.
Matud pa sa Presidente, ang 39 nga pantalan milangkob sa Western Nautical Highway (WNH) gikan sa Batangas, mo-agi sa Mindoro, Panay ug Negros padung sa Mindanao, ug ang natukod karong tuiga nga Central Nautical Highway (CNH) nga gikan sa Bicol, mo-agi sa Masbate, Cebu, Bohol ug Camiguin padulong sa Mindanao. ”
Gibutyag usab sa Presidente, nga ang pagtukod sa maong mga RORO nga pantalan, nagpalig-on sa ekonomiya, kay kon basehan lang ang tuig 2007, ang mga barko niini mokarga man ug kapin sa 33 milyones metric tons nga kargaminto ug laing 31 milyones ka mga pasahero.
Kini usab nipaos-os og bayrunon sa biyahe o ‘transport cost’ sa mga kompanya, labina ang Nestle ug pan sa Iloilo nga Gardenia, mao nga sila makahatag ug baratong presyo sa ilang mga produkto.
Gipasalamatan usa sa Presidente ang mga lokal nga pangagamhanan nga mi-undang og pangolekta sa mga sakyanan nga molabay sa ilang dapit ug nagdala sa ilang produkto sa kauluhan, nga mao ang nagpa-os pa ug samot sa ‘transport cost’. (PIA/Bohol)
