NAMATAY ang usa ka tawo human aksidenteng nabanggaan og usa ka motorsiklo dihang nitabok sa nasudnong dalan didto sa Sitio Candabong, barangay Canhaway, Guindulman, Bohol niadtong Sabado sa gabii.
Giila ang biktima nga si Teodoro Pelarada, hamtong ang pangedaron, minyo ug nagpuyo sa Sitio Pandayan sa samang dapit. Nahiagom sa daghang samad sa nagkandaiyang bahin sa lawas ang biktima ug wala na makaabot nga buhi dihang gihatud sa usa ka tambalanan sa dakbayan sa Tagbilaran.
Matud sa taho nga samtang ang biktima nitabok sa pikas bahin sa karsada mga alas 7:30 sa gabii dihang ang usa ka Honda XRM 125 kolor itom nga may plaka 5371 GK ug gimanehoan ni Asterio Ayuban, 18-anyos, taga-barangay Guinsularan, Duero, Bohol kuyog sa
usa ka wala mailhing backrider aksidenteng nibangga sa maong biktima.
Ang naasoyng drayber ug backrider gidala sa Gov. Celestino Gallares Memoroial Hospital sa siyudad samtang ang motorsiklo gi-impound didto sa Guindulman Police Station. (Andy Nalzaro)
