SUKWAHI sa baruganan sa simbahan kalabut sa mga rebeldeng opisyal nga miapil sa napakyas nga coup d etat niadtong 2003, gi-aprobahan ni Presidente Gloria Macapagal Arroyo ang pasaylo alang sa 9 ka opisyal nga una na nga napamatud-ang sad-an.
Kini nga buhat sa Presidente mao usab ang sugyot ni kanhi AFP chief Hermogenes Esperon Jr.
Matud ni Esperon, ang 9 mipakita na ug pagbasul human sila miangkong sad-an sa sumbong nga nagpasiugda ug coup d’etat atubanagn sa usa ka sibil nga korte. Ila na usab nga nasilbihan ang lima ka tuig nga pagka bilanggo.
Tungod niini, sila Army captains Milo Maestrecampo ug Gerardo Gambala kinsa napatawan sa tibuok kinabuhi nga pagka bilanggo ug 7 pa ka junior officers nga may 12 ka tuig nga pagkatanggong, gipasaylo na.
Hinuon, ang 9, kinsa mga sakop sa siak nga pundok sa Magdalo, gidid-an na sa pagbalik sa serbisyo samtang gipapas na ang ilang mga ranggong gihuptan.
Una na nga mipadayag ang simbahan nga ang pagpasaylo sa mga sakop sa Magdalo mag-aghat ug mas grabe pa nga military adventurism.
Hinuon, matud ni Pres. Arroyo, tungod sa tawhanong rason, iya kini nga gibuhat sama nga napasaylo usab si kanhi presidente Joseph Estrada, kinsa namatud-ang sad-an sa pangurakot ug gisilotan sa pagka-bilanggo sa tibuok kinabuhi. (rachiu/PIA)
