139 na ka kaso sa Agosto, 3 patay
GIBASUL sa City Health Office kun CHO ang mga transient residents o kadtong taga-lungsod nga temporaryong nagpuyo sa dakbayan sa Tagbilaran nga maoy nakatampo sa pagsaka sa kaso sa nataptan og sakit nga dengue sa bulan sa Agosto.
Si City Health Officer, Dr. Alberto Jones nibutyag sa Bohol Balita nga dili mga Tagbilaranon ang ubang natakbuyan sa maong makamatay nga sakit nga aduna nay 139 ka kaso sa bulan sa Agosto ug tulo na ang namatay gikan sa Enero hangtud sa maong bulan.
Gipunting ni Jones nga ang mga estudyante kinsa nagsaka og mga boarding house nga mataptan sa maong sakit mogamit og adres sa siyudad kun ma-admit sa Gov. Celestino Gallares Memorial Regional Hospital.
Gitumbok usab ni Jones nga ang namuyo sa mga squatter area nga gikan sa mga kalungsuran nakatampo usab sa pagsaka sa talaan sa maong sakit kay mogamit usab sa adres sa siyudad.
Sa laing bahin, gibutyag ni Jones nga ang barangay Cogon nakatala og pinakadaghang kaso nga may 22 ka biktima sa bulan sa Agosto gisundan sa barangay Bool nga may 21 ug ikatulo ang barangay Dao nga dunay 17. Ang maong talaan naghatag na og alarma sa mga kagamhanang lokal human nabutang ang barangay Cogon sa usa ka nasyunal nga pamantalaan nga ikawalo nga barangay sa nasud nga dunay daghang nabiktima sa dengue.
Gumikan niini, gipahigayon ang fogging operation sa mga lugar sa barangay Cogon kagahapon nga naglakip sa Tamblot, Calceta, Lower Cogon ug tunghaan sa elementarya.
Matud ni Jones nga gawas sa fogging machine nga mopatay sa mga hamtong nga lamok nigamit usab sila og kemikal nga Abate aron ibutang sa stagnant kun nagpundo nga tubig aron mapatay ang waya-waya.
Nagpahigayon usab sila og information campaign sama sa 4″ o’ clock hapit nga mao ang paglimpiyo sa palibot pinaagi sa pagyabo sa mga pundo nga tubig.
Dugang niya nga nakapalit ang siyudad og fogging machine ug mga kemikals alang sa pagpakgang sa pagkuyanap sa maong makamatay nga virus sa lamok. (Andy Nalzaro)
