BISAN pa sa pagtapos sa nasudnong gun ban niadtong Miyerkoles sa tungang gabii, padayon gihapon ang implementasyon niini sa ubang lugar sa probinsiya sa Basilan, Bulacan ug Lanao del Sur nga napakyas sa pagpahigayon sa Barangay, SK eleksiyon niadtong Oktubre 25.
Matud pa ni Sr. Supt. Noel Barraceros, PNP Deputy Spokesman, gipadayon pa ang gun ban sa tibuok probinsiya sa Basilan, unang distrito sa Bulacan ug ubang mga lugar sa Lanao del Sur tungod sa pagahimoong special elections didto sa Nobyembre 13.
Dugang pa ni Barraceros, gi extend hangtud Nobyembre 28 ang gun ban sa maong mga lugar agig pagsunod sa patakaran nga epektibo sulod sa 15 ka adlaw ang gun ban human matapos ang special elections.
Samtang padayon gihapon ang liquor ban sa Nobyembre 13 nga eleksiyon nga limitado lamang sa mga lugar diin ipahigayon ang eleksiyon.
Agig pagsunod sa pagtapos sa gun ban, mahimo nang dalhon sa mga gun owners ang ilang mga armas kung aduna sila’y Permit To Carry Firearms Outside Residence (PTCFOR) nga gi isyu sa PNP.
Sa tala sa PNP, niabot na sa 926 ka tawo ang nadakpan sukad gipatuman ang gun ban niadtong Setyembre 25. (PIA)
