Gipasaka na karong hapon sa Department of Justice (DOJ) sa Makati Metropolitan Trial Court (MeTC) ang bag-ong kaso batok ni kanhi Batangas Governor Jose Antonio Leviste human ang walay pagtugot nga pagsulod-gawas niini sa bilanggoan.
Matud pa ni Senior State Prosecutor Lilian Doris Alejo, gi-aprubahan na ni Prosecutor-General Claro Arellano ang iyang resolusyo nga pasakaan og kasong paglapas sa Article 157 sa Revised Penal Code o evasion of service of sentence si Leviste.
Pasabot ni Alejo, adunay tugbang nga silot nga unom ka tuig nga pagkabilanggo ang maong kaso.
Gibase sa prosecutor ang iyang desisyon sa mga gidusong ebidensya sa National Bureau of Investigation (NBI), apil na niini ang video footage sa pagka-aresto kang Leviste.
Alas-5 sa hapon niadtong Miyerkules sa dihang gi-aresto si Leviste sa taga NBI-National Capital Region ug Intelligence Division didto sa gipanag-iya niyang LPL Towers sa Legaspi Village, Makati City.
Si Leviste nasentensyahan sa korte nga mabilanggo og 6 hangtud 12 ka tuig sa kasong pagpatay sa iyang aide nga si Rafael delas Alas niadtong Enero 12, 2007.
