IDUSO sa Malakanyang ngadto sa Kongreso ang gisugyot nga P1.4 trilyones nga nasudnong budget alang sa 2009.
Kini human pirmahi ni Presidente Gloria Macapagal-Arroyo ang budget proposal sa miaging mga adlaw.
Ang proposed budget sa tuig 2009 may 15% nga labaw sa P1.227-trilyones nga budget sa 2008.
Matud sa Presidente, ang budget magtubag dili lang sa kasamtangang nasinati nga krisis sa pagkaon ug gasolina. Kini usab magtubag sa gikinahanglang pundo alang sa mga programa sa kagamhanan ilabi na sa kalikopan, edukasyon ug ekonomiya.
Partikular niini mao ang mga kalsada, tulay ug uban pang pampublikong imprastraktura, tabang alang sa sector sa agrikultura, edukasyon, social welfare ug ang health insurance program sa kagamhanan.
Samtang nanghinaut ang palasyo nga dasonan sa Kongreso ang budget sa Disyembre ning tuig, andam na usab sila nga mapakyas ang mga magbabalaod sa paglagda sa budget sama sa mga nagpanghitabo sa miaging mga tuig. (rachiu/PIA)
