TAGBILARAN CITY, Aug. 17 (PIA) – GISEGURO gahapon sa lider sa Senado ug Kamara nga hatagan niini og prayoridad ang 13 ka balaodnon nga gitumbok nga priority measures ni Presidente Benigno Aquino III sa gipahigayon nga Legislative-Executive Development Advisory Council (LEDAC) meeting gahapon sa Malacañang.
Nagkauyon silang Senate President Juan Ponce Enrile ug House Speaker Sonny Belmonte nga tun-an og maayo ug hatagan og prayoridad ang gitumbok nga 13 ka priority bills sa LEDAC meeting.
Apil sa 13 ka priority bills ang paghatag og proteksiyon sa mga katabang sa panimalay, expansion sa science and technology scholarship programs, amendments sa Rural Electrification Law, sin tax, amyenda sa Human Security Act & Data Privacy Act, ug apil na usab
ang Responsible Parenthood (RP) bill.
Samtang dismayado ang ubang senador human wala gi apil ang Freedom of Information Bill (FOI) sa mga priority measures sa Malacanang.
Nagtuo si Senate Majority Leader Tito Sotto nga inay iduso ang Reproductive Health bill, mas angay hatagan og prayoridad ang FOI bill nga gilauman nga makatabang usab sa pagsumpo sa korupsiyon sa nasud.
Sa maong balaodnon, mas mapadali ang pagkuha sa mga dokumento sa gobyerno. (PIA-Bohol/ecb)
