TAGBILARAN CITY, Bohol, April 18 (PIA)–Gitubag sa Malacañang ang forecast sa International Monetary Fund (IMF) nga mohinay ang ekonomiya sa Pilipinas kun itandi sa ubang miyembro sa Association of Southeast Asian Nations (ASEAN-5) sugod ning tuiga hangtud sa 2013.
Base sa pahayag sa IMF, molambo lamang sa 4.2 percent ang gross domestic product (GDP) sa nasud karong 2012 samtang 4.7 percent lamang sa 2013.
Gitumbok nga hinungdan sa IMF ang hinay nga global trade ug ang grabeng pagdaginot sa administrasyon ni Presidente Benigno “Noynoy” Aquino III.
Midepensa si Communications Sec. Ricky Carandang nga makurat na lamang ang IMF kun malabwan ang ilang target.
Matud pa ni Carandang, nagtuo silang mokabat sa lima hangtud six percent ang ilambo sa atong ekonomiya karong tuiga.
Apan gitataw ni Carandang nga ang mahinungdanon, ang unsa mang paglambo sa nasud angay mas mabati sa kadaghanan.
“I believe the IMF will be surprised when our GDP growth exceeds their targets. We’re looking at 5 to 6 percent growth,” matud pa ni Carandang. (PIA-Bohol/ecb)
PH, ika-3 sa pinakadaghang kaso sa pagpatay sa mga mamamahayag sa tibuok kalibotan
TAGBILARAN CITY, Bohol, April 18 (PIA)–Wala natandog ang Pilipinas sa ikatulong pwesto isip adunay pinakadaghang kaso sa pagpatay sa mga mamamahayag sa tibuok kalibotan.
Matud pa sa 2012 Impunity Index sa Committee to Protect Journalists (CPJ) nga naka-base sa New York City, ang korapsyon ug dili epektibong criminal justice system sa Pilipinas ang hinungdan kun nganong wala pa nahatagan og hustisya ang 55 ka kaso sa pagpatay sa mga miyembro sa media niining milabay nga dekada.
Pipila sa padayon nga gitutokan sa CPJ ang Maguindanao Massacre niadtong tuig 2009 diin dili moubos sa 30 ang gidaghanon sa media ang gipatay ug ang pagpatay sa environmentalist ug broadcaster nga si Doc Gerry Ortega niadtong tuig 2011.
Nag-una sa listahan ang Iraq diin 93 ka kaso sa pagpatay sa mga miyembro sa media niining milabay nga dekada ang wala pa usab nasulbad.
Ikaduhang puwesto ang Somalia, ikatulo ang Pilipinas ug ika-upat usab ang Sri Lanka.
Matud pa sa CPJ, ang Impunity Index rating sa Pilipinas naa sa 0.589 unsolved journalist murders per million inhabitants.
Gitataw pa sa CPJ nga wala pa naapil sa ihap ang mga journalist nga namatay sa giyera o sa mga assignment sa nagkalain-laing coverage apil na sa mga lihok-protesta. (PIA-Bohol/ecb)
