TAGBILARAN CITY, Bohol, June 22 (PIA)–Mi-ani og pagdayeg si Presidente Benigno “Noynoy” Aquino III dili lamang sa katawhan dinhi sa atong nasud, apan bisan sa international community usab tungod sa padayon nga kampanya sa gobyerno sa pagkab-ot sa kalinaw ug seguridad sa nasud.
Kini ang gipahayag ni Presidential Adviser on the Peace Process Secretary Teresita Quintos Deles kagahapon base sa milabay nga pagtuon sa Institute for Economics and Peace ug sa Ulat ng Bayan sa Pulse Asia kalabot sa gihingusgan nga peace efforts sa administrasyong Aquino karon.
Base sa 2012 Global Peace Index sa Institute for Economics and Peace, nabutang sa top five ang Pilipinas sa hut-ong sa mga nasud nga gi-ila nga adunay pinaka-dakung kausaban sa pagbaton og kalinaw sa nasud.
Sa resulta usab sa survey sa Pulse Asia’s Ulat ng Bayan, mi-ani og high approval ratings ang administrasyong Aquino sa gihimo niining mga programa aron makab-ot ang kalinaw sa nasud.
Ang Pulse Asia’s Ulat ng Bayan National Survey gipahigayon niadtong Mayo 20-26, 2012 nga nagpakita nga 50 porsyento sa mga respondents niini ang miingon nga kampante ug aprubado nila ang gihimong lakang ni Presidente Aquino sa paningkamot niining makab-ot ang kalinaw sa nasud.
“Similar to other governance reforms being implemented under this administration, President Aquino’s continuing efforts on peace and security are already being felt and recognized not just by our people, but also by the international community,” pamahayag ni Deles.
“These will further raise the public’s hopes for a just and lasting peace,” dugang pa niini.
Nakab-ot sa Pilipinas ang taas nga score sa 2012 Global Peace Index base sa resulta sa natala nga pagkunhod sa homicide rate, gidaghanon sa namatay gikan sa internal conflict, likelihood og violent demonstrations, ug mga insidente sa terrorist acts. (PIA-Bohol/ecb)
