TAGBILARAN CITY, Bohol, June 27 (PIA)–Gihingosgan pa sa gobyerno ang kampanya niini batok sa child labor.
Kini pinaagi sa “Batang Malaya: Child labor free Philippines” nga usa ka nasudnong kampanya isip tubag sa nagka-grabeng kahimtang karon sa mga menor-de-edad nga nagsugod na og panarbaho.
Sa labing ulahing survey sa National Statistics Office (NSO), migawas nga sa 29 ka milyong kabataang Filipino nga may edad 5 hangtud 17-anyos, halos 5.5 milyon niini mga child workers.
Sa maong gidaghanon sa child workers, halos 3 milyon niini delikado ang trabaho ilabi na sa mga kabataang lalaki nga mikabat sa 66.8-percent, samtang 33.2 percent usab ang mga kabataang babaye nga naa sa hazardous child labor.
Natala usab sa Central Luzon ang pinakadaghan nga mga batang child worker nga mikabat sa 10.6%, Bicol-10.2%, Western Visayas-8.5%, Northern Mindanao-8.2% ug Central Visayas-7.3 percent.
Kasagarang nagtrabaho kining mga bata sa bukid, minahan, quarry, pabrika ug construction samtang may nalambigit usab sa prostitusyon.
Suportado sa International Labor Organization (ILO) ang kampanya sa Pilipinas.
Matud pa ni Director Lawrence Jeff Johnson sa ILO Country Office sa Pilipinas nga kakabus ang gamut sa child labor mao nga angay kining solusyonan sa gobyerno. (PIA-Bohol/ecb)
DOH: 10 Pinoy nangamatay matag oras tungod sa panigarilyo
TAGBILARAN CITY, Bohol, June 27 (PIA)–Napulo ka Pilipino ang nangamatay matag oras o 240 matag adlaw tungod sa pagpanigarilyo.
Sa labing ulahing talaan sa Department of Health (DOH), may edad 15-anyos pataas ang populasyon sa mga tigpanigarilyo.
Ang mas gikabalak-an sa DOH, apil na ang Pilipinas karon sa Top 20 sa tibuok kalibotan
nga adunay dakung populasyon sa mga tigpanigarilyo diin gibanabanang mokabat na sa 17.3 milyon nga kalalakin-ang Pinoy ug 14.6 milyon usab ang mga babayeng tigpanigarilyo.
Matud pa sa DOH Consultant nga si Dr.Tony Leachon, kun dili mohunong sa pagpanigarilyo ang mga hingtungdan, posible silang magkasakit sama sa stroke, heart attack, cancer, chronic obstructive pulmonary disease (COPD) ug diabetes.
Mao nga naglaum ang DOH nga mapasar na sa Senado ang Sin Tax Bill nga gituohan nilang makatabang sa pagkunhod sa gidaghanon sa mga tigpanigarilyo. (PIA-Bohol/ecb)
Red tide alert sa Tagbilaran bay area
TAGBILARAN CITY, Bohol, June 27 (PIA)–Nipahimangno ang mga tinugyanan sa Bureau of Fisheries and Aquatic Resources (BFAR) sa publiko nga likayan una ang pagkaon sa tanang matang sa mga kinhason nga makuha sa kadagatan sa syudad tungod sa red tide.
Gibutyag ni Cresencio Pahamutang, ang tinugyanan sa BFAR nga gawas sa Tagbilaran bay area, mikatap na ngadto sa walo ka barangay sa syudad ang red tide.
Una nang nipahimangno sa miaging mga adlaw ang BFAR sa paglikay sa pagkaon sa tanang matang sa kinhason dinha sa Causeway nga gitaliwad-an sa Dauis ug Tagbilaran.
Apan sa usa ka radio interview ganinang buntag, gibutyag ni Pahamutang nga mikatap na usab ang red tide sa kadagatan sa Poblacion 1, Mansasa ug Poblacion 2 nga adunay taas nga red tide organism samtang ang kadagatan sa Bool, Cogon, Booy, Taloto ug Manga nakitaan usab og red tide organism.
Gitambagan ang publiko nga likayan una ang pagkaon sa tanang matang sa mga kinhason nga makuha niining mga dapita hangtud sa tukmang panahon nga ilibkas na sa BFAR ang ilang red tide advisory.
Ang red tide namugna tungod sa climatic condition ug nakatampo usab niini ang mga gikan nga hugaw sa tawo ug mga hayopan nga mabanlas sa dagat gumikan sa mga pag-uwan. (PIA-Bohol/ecb)
