TAGBILARAN CITY, Bohol, July 06 (PIA)–Kumpiyansa si Presidente Benigno “Noynoy” Aquino III nga dili na ipaagi og tagna ang pagbanabana sa gidaghanon sa ulan o pagbaha sa nasud.
Gihimo sa Presidente ang pahayag dungan sa pormal nga paglusad sa Project: Nationwide Operational Assessment of Hazards (NOAH) sa DOST-Pagasa sa syudad sa Marikina.
Gipasigarbo sa gobyerno ang maong proyekto tungod kay gimugna kini sa mga local scientists sa nasud ug nagtinguha nga makatubag sa panginahanglan sa panahon sa kalamidad sa tabang sa website nga www.noah.dost.gov.ph.
Matud pa ni Presidente Aquino, sa gamit nga mga Doppler radar, real-time nga makita ang gidaghanon sa ulan nga mobundak sa usa ka lugar.
Dugang pa sa Presidente, mapamatud-an nga ang kinabuhi dili “weather-weather” lang ug giingong dili uso ang panultihon nga “bahala na si Batman.”
Giingong dili na tsamba ang pagbanabana sa kadaot nga dalhon sa ulan, baha ug pagdahili sa yuta tungod kay makita naman sa website ang mga eksaktong impormasyon.
Niining paagiha, makapag-desisyon na nga walay pagduha-duha ang mga hingtungdan sama sa mga school administrators ug mga mayor sa sayo nga pagsuspinder sa klase o pagplano sa mga lakaw o bakasyon. (PIA-Bohol/ecb)
Pagmugna og sumbanan sa Airline Passenger Rights, gisugdan na
TAGBILARAN CITY, Bohol, July 06 (PIA)–Gisugdan na ang serye sa public hearing sa Department of Transportation and Communications (DOTC) kauban ang Department of Trade and Industry (DTI) alang sa pagmugna og sumbanan sa Airline Passenger Rights.
Matud pa ni Transportation and Communications Secretary Mar Roxas, usa sa mga nag-unang hisgotan sa unang adlaw ang kanunay nga reklamong nadawat gikan sa mga pasahero sama sa overbooking, maka-ilad nga commercial ads, cancelled flights, denied boarding, kakuwang sa pahibalo sa mga bagahe ug uban pa.
Sa unang parte pa lang sa tuig, mikabat na sa 140 ang nadawat nga reklamo sa mga awtoridad nga mas taas kun itandi sa 97 nga nadawat niadtong tuig 2011 ug 84 niadtong 2010.
Gusto sa DOTC nga makuha ang habig sa tanang stakeholder sa airline industry aron mahimong patas ug transparent ang maong public hearing ilabi na nga gilauman ang paspas nga pag-usbaw sa turismo sa nasud.
Gipaabot nga sulod sa usa ka buwan, makamugna na og sumbanan sa Airline Passenger Rights. (PIA-Bohol/ecb)
SWS: Unemployment rate sa nasud, mikunhod
TAGBILARAN CITY, Bohol, July 06 (PIA)–Mikunhod ang unemployment rate sa nasud base sa labing ulahing resulta sa survey sa Social Weather Station (SWS).
Sa gipahigayon nga survey niadtong Mayo 24-27, migawas nga nahagbong na lang sa 26.6 porsyento ang unemployment rate sa nasud gikan sa 34.4 porsyento niadtong Marso 2012.
Nangahulugan kini nga gikan sa 13.8 milyon nga walay trabaho kaniadto, mikunhod na kini sa 10.9 milyon karon.
Migawas nga 2.9 milyong Filipino ang nakuha sa listahan sa mga walay trabaho sulod lamang sa halos duha ka buwan nga deperensya.
Sa maong gidaghanon, 10 porsyento ang boluntaryong mihawa sa trabaho samtang 11 porsyento ang dili boluntaryo.
Pitong porsyento usab ang wala na na-renew ang kontrata, 2 porsyento ang nagsarado ang kumapanyang gisudlan ug 2 porsyento ang na-lay off.
Lima ka porsyento usab ang mga first time job seeker. (PIA-Bohol/ecb)
NBI: Facebook hacking, bag-ong modus operandi sa mga kriminal
TAGBILARAN CITY, Bohol, July 06 (PIA)–Nipasidaan karon ang National Bureau of Investigation (NBI) batok sa Facebook hacking nga maoy bag-ong modus operandi sa mga sindikato karon.
I-hack sa mga miyembro sa sindikato ang Facebook account sa usa ka indibidwal nga maoy gamiton nila sa pagpangilad sa ubang tawo.
Ang Pilipinas ang ika-walo nga nasud sa tibuok kalibotan nga adunay pinakadaghang tiggamitan og Facebook.
Sa kapin 28 milyong Pilipino nga tiggamitan og Facebook, 63 porsyento niini ang edad 18 hangtud 34.
Tambag sa NBI, mag-amping sa pag-add sa mga kaila sa Facebook, himuang private ang setting ug magbutang lang og limitadong impormasyon.
Gamit lang usab og lisod nga password aron dili daling ma-hack ang account ug ayaw pakigkita sa ka-chat kun dili kumpirmado ang pagkatawo niini. (PIA-Bohol/ecb)
