TAGBILARAN CITY, Bohol, July 18 (PIA)–Gitakdang makigtigom ang Department of Health (DoH) sa Biyernes sa mga pediatrician isip pagpangandam sa human enterovirous 71 o EV-71.
Matud pa ni DoH spokesman ug assistant secretary Dr. Eric Tayag, ipatawag ang mga pediatrician pinaagi sa Philippine Pediatric Society aron makatabang sa pagpangandam sa sumbanan kalabot sa mga pasyenteng gitohuang adunay EV-71.
Dugang pa ni Tayag, gitahasan na nila ang mga ospital nga motaho sa DoH kalabot sa mga kaso sa hand, foot and mouth disease (HFMD).
Tambag sa ahensiya sa mga ginikanan, dalhon dayon sa ospital ang ilang mga anak nga adunay sintomas sa HFMD sama sa hilanat, kakapoy, ubo, pagkalibanga ug makitaan usab ug mga hubag-hubag sa nagkalain-laing parte sa lawas o skin rashes.
Una niini, gikumpirmar kagahapon sa DoH ang duha ka batang nag-positibo sa enterovirus.
Apil ang duha sa pito ka specimen nga gidala ug gisusi sa Research Institute for Tropical Medicine (RITM) sa syudad sa Muntinlupa.
Apan gitataw ni Tayag nga bisan kumpirmadong EV case ang duha ka bata, kumpirmahon pa gihapon nila kini kun ang maong EV-71 strain ang nakaingon sa kamatayon sa daghang mga bata sa Cambodia nga nagpangedaron og lima ka tuig pataas.
Gitambagan usab ang mga bata nga kanunay manghugas og kamot tungod sa maong sakit nga mahimong mokatap pinaagi sa hugaw sa tawo, laway ug gikan sa samad sa pasyente. (PIA-Bohol/ecb)
