TAGBILARAN CITY, Bohol, Aug. 17 (PIA)–Plano ni Presidente Benigno “Noynoy” Aquino III nga magdugang og 61,510 ka magtutudlo sa tibuok nasud sa sunod tuig.
Matud pa ni Aurora Rep. Juan Edgardo Angara, dakung butang ang pagdugang sa mga magtutudlo aron makuhaan ang kakulang sa mga magtutudlo sa tibuok nasud nga adunay pondong P14.6 bilyon.
Apan gitataw ni Angara, chairman sa House committee on higher and technical nga angay siguradohon una nga kadtong mga maayong magtutudlo ang kuhaon sa gobyerno ug dili tungod kay adunay kaila nga maimpluwensyang indibiduwal sa gobyerno.
“DepEd will be holding a year-long job fair next year. The Department of Education ‘to hire based on merit’ so that ‘the best and the brightest’ and not those ‘with closeness and connections’ to influential persons will be chosen,” matud pa ni Angara.
Gawas niini, gitakda usab nga mokuha ang DepEd og 3,500 ka non-teaching employees nga adunay pondong igahin nga P730 milyon sa sunod tuig ug pagpalit usab sa mga gamit ug pagpatukod og mga lawak-tunghaan.
“To be built are 31,789 classrooms and 90,461 toilets at a cost of roughly P25.3 billion, which puts on track the SONA promise of President Aquino to wipe out the classroom shortage by end of 2013,” pasabot ni Angara.
Mopalit usab ang DepEd og 639,185 ka lingkuranan nga nagkantidad og P575 milyon, 31.1 milyong libro nga nagkantidad og P1.49 bilyon ug usa ka milyong scholarship slots ubos sa GASTPE program nga gigahinan og P6.98 bilyon. (PIA-Bohol/ecb)
P16-M nga tabang sa US, aprubado na ni Obama
TAGBILARAN CITY, Bohol, Aug. 17 (PIA)–Gikumpirmar ni US Ambassador to the Philippines Harry Thomas nga magdugang og P16 milyon nga tabang ang ilang nasud isip suporta sa mga Pinoy nga naapektuhan sa nagsunod nga kalamidad.
Matud pa ni Thomas, aprubado na ni US President Barack Obama ang maong pondo, mao nga posibleng moabot na kini sa Pilipinas sa mga mosunod nga adlaw.
Gihimo sa US envoy ang pahayag dungan sa iyang pagbisita sa pipila ka evacuation center sa lalawigan sa Rizal.
Una niini, nihatag na og $100,000 aid ang U.S. government alang sa mga nabiktima sa baha sa Metro Manila ug sa mga duol nga lalawigan.
Gisiguro usab sa embahador nga magpabilin silang kaabag sa Pilipinas sa mga panahon sa kalamidad. (PIA-Bohol/ecb)
