TAGBILARAN CITY, Bohol, Aug. 30 (PIA)–Milambo gamay ang gross domestic product (GDP) sa Pilipinas sa second quarter ning tuig.
Matud pa ni Acting Socio-economic Planning Secretary ug National Economic and Development Authority (NEDA) Director-General Arsenio Balisacan, nitala sa 5.9-percent ang growth rate sa nasud niining Abril hangtud Hunyo 2012 gikan sa 6.3-percent nga revised GDP alang sa buwan sa Enero hangtud Marso.
Bisan pa niini, giingong mas taas pa gihapon ang 5.9-percent kun itandi sa 5.3-percent nga market forecast.
Giingong nalabwan usab sa nasud ang average growth nga 4.7-percent alang sa mga miyembro sa Association of Southeast Asian Nations (ASEAN).
Nalabwan pa sa GDP sa Pilipinas ang economic growth sa Malaysia nga 5.4-percent, Thailand sa 4.2-percent, Vietnam sa 4.4-percent ug Singapore nga 2.0-percent.
Sigun pa kang Balisacan, daku ang natabang sa paglambo sa export industry ug turismo sa nasud sa paglambo sa ekonomiya.
Dugang pa sa kalihim, gipaspasan na ang pagpa-ayo sa mga naguba sa bagyo ug niaging mga kalamidad aron nahimong gamay lamang ang epekto niini sa economic growth sa mosunod nga quarter.
Giingong magpabilin usab ang target nga 5-percent hangtud 6-percent nga growth rate sa nasud ug kumpiyansa kining magpadayon ang maayong record sa mosunod nga quarter sa tuig. (PIA-Bohol/ECB/I-ed)
Bag-ong DILG chief, i-anunsyo sa Palasyo sa sunod semana
TAGBILARAN CITY, Bohol, Aug. 30 (PIA)–I-anunsyo na ni Presidente Benigno “Noynoy” Aquino III sa sunod semana ang mahimong mohulip sa namatay nga kalihim nga si Jesse Robredo isip bag-ong mamuno sa Department of Interior and Local Government (DILG).
Matud pa ni Presidential Spokesperson Edwin Lacierda, hinganlan sa Presidente ang bag-ong DILG Secretary sa dili pa kini moadto sa nasud sa Russia aron motambong sa Asia Pacific Economic Cooperation (APEC) Leaders’ Meeting.
Sa pagkakaron, si Executive Secretary Paquito “Jojo” Ochoa ang nibarug isip officer-in-charge sa gibiling pwesto ni Robredo.
“He will name a replacement before he leaves for Russia. We will make the announcement at the proper time. The President recognizes the need for the replacement,” ani Lacierda.
Naa ubos sa buhatan sa DILG ang pagtutok sa mga lokal nga kagamhanan sa nasud, ang pulisya, Bureau of Fire Protection ug uban pa. (PIA-Bohol/ECB/I-gg)
