TAGBILARAN CITY, Bohol, Aug. 31 (PIA)–Pormal nang gi-anunsyo ni Presidente Benigno “Noynoy” Aquino III si Secretary Mar Roxas isip bag-ong kalihim sa Department of the Interior and Local Government (DILG) isip hulip sa mipanaw na nga si Sec. Jesse Robredo.
Gi-anunsyo sa Presidente ang appointment ni Roxas sa Malakanyang karon lamang hapon.
Apil sa mga marching orders sa Presidente kang Roxas ang pag-atiman sa problema sa pulisya, BJMP, palapdan pa ang local governance ug pagbungkag sa private armies.
Dungan niini, gitudlo usab ni PNoy si Cavite Rep. Joseph Emilio Abaya sa Department of Transportation and Communications (DOTC) isip hulip ni Roxas.
Samtang ang congressional task ni Abaya itugyan na lamang sa mga opisyal sa Kongreso, ilabi na nga gi-gunitan niini ang sensitibo nga pwesto isip House appropriations committee chairmanship.
Si Roxas ug Abaya parehong taas nga opisyal sa ruling party nga mao usab ang partido nga gisakopan ni Robredo. (PIA-Bohol/ECB/I-gg)
Revised SALN ni CJ Sereno, gipakita na sa publiko; net worth, nikabat sa P18-M
TAGBILARAN CITY, Bohol, Aug. 31 (PIA)–Gipakita na ang kopya sa statement of assets, liabilities and net worth (SALN) ni Chief Justice Maria Lourdes Sereno pila ka adlaw human kini natudlo sa posisyon.
Base sa SALN, mikabat ang net worth sa bag-ong punong mahistrado sa P17, 985, 375.51.
Mas ubos kini kun itandi sa unang gipagawas nga P18, 029, 575.51 kagahapon.
Base sa opisyal nga pahayag sa Office of the Chief Justice, sayop ang napagawas nila kagahapon nga SALN ni Sereno ug ang kopya gikan sa clerk of court ang sakto.
Samtang, mikabat usab sa P19, 227, 578.85 ang kinatibuk-ang kantidad sa mga katigayonan ni Sereno.
Apil niini ang tulo ka house and lot sa Filinvest East, Cavite ug Davao apil na usab ang usa ka memorial lot sa Cavite ug usa ka lote sa Filinvest nga napalit niadtong tuig 2011.
Adunay tulo ka sakyanan nga nakapangalan kang Sereno (Toyota Altis 2005, Toyota Corolla 1997 ug second hand nga Mitsubishi Lancer 1993) ug cash sa bangko nga nagkantidad og P1, 185, 602.60.
Samtang mikabat usab sa P1, 242, 203.34 ang liabilities o utang sa chief justice. (PIA-Bohol/ECB/I-gg)
