TAGBILARAN CITY, Bohol, Sept. 11 (PIA)–Gibarugan karon sa Malacañang nga wala sila’y nakitang malisya sa pagmandu ni Presidente Benigno “Noynoy” Aquino kang DILG Undersecretary Rico Puno nga ikandado ang mga buhatan ni Sec. Jesse Robredo.
Matud pa ni Presidential Communications Secretary Sonny Coloma, gusto lamang ni Presidente Aquino nga ma-secure ang mga dokumento nga gikonsiderar nga ‘confidential.’
Sigun pa kang Coloma, wala may nahibalo nga si Puno ang subject sa imbestigasyon ni Robredo mao nga walay sayop kun siya ang gimanduan sa Pangulo.
Dungan niini, gitataw ni Coloma nga ang mandu sa Pangulo kang Puno mao nga ‘to seal’ ang buhatan ni Robredo ug wala mandu-i nga kuhaon o mangita sa bisan unsang dokumento.
Una nang gipahayag si Presidential Spokesman Edwin Lacierda nga dili ‘untouchable’ si Puno o bisan kinsa kanila sa administrasyon. (PIA-Bohol/ECB/I-gg)
DND, planong mopalit og spy plane
TAGBILARAN CITY, Bohol, Sept. 11 (PIA)–Isip parte sa modernization program, nangita na ang Department of National Defense og spy plane alang sa Armed Forces of the Philippines (AFP) partikular na ang Philippine Air Force (PAF) alang sa pagpatrulya sa teritoryo sa nasud.
Matud pa ni Defense Spokesman Dr. Peter Paul Galvez, daku ang matabang sa long –range patrol aircraft sa teritorial defense kalabot sa padayon nga intrusyon sa West Philippine Sea.
Gi-proseso na karon ang negosasyon sa pagpalit og mga spy plane aron dili na manghulam pa ang security forces sa Pilipinas sa nasud sa Estados Unidos.
Gikonsiderar usab sa Defense nga mopalit og surveillance aircraft gikan sa Indonesia ug Europe.
“We’re looking at Indonesian and European. Various manufacturers are being looked into, the most appropriate for our purposes,” matud pa ni Galvez diin matud pa niya nga gitun-an pa ang pagpalit og spy plane.
“That is the work of the long-range patrol aircraft, maritime surveillance, for maritime security,” pasabot pa niini.
Karong tuiga, desedido usab ang Defense department nga itodo ang capability upgrade sa AFP sa nakalinyang 138 ka proyekto niini sa modernisasyon nga mokabat sa P70 bilyon ang kantidad. (PIA-Bohol/ECB/I-sjp)
