TAGBILARAN CITY, Bohol, Sept. 03 (PIA)–Karon pa lang, mahimo nang tiguman ug pangandaman ang bakasyon sa pamilya alang sa sunod tuig human gipagawas na sa Malacañang ang mga deklaradong holidays sa 2013.
Base sa Proclamation 459 nga gilagdaan ni Presidente Benigno ‘Noynoy’ Aquino III niadtong Agosto 16, ang regular holidays mao ang mosunod: New Year’s Day, Enero 1 (Martes); Huwebes Santo, March 28; Biyernes Santo, March 29; Araw ng Kagitingan, Abril 9 (Martes); Labor Day, Mayo 1 (Miyerkules); Independence Day, Hunyo 12 (Miyerkules); National Heroes Day, Agosto 26 (Monday); Bonifacio Day, Nobyembre 30, (Sabado); Christmas Day, Disyembre 25 (Miyerkules); ug Rizal Day, Disyembre 30, (Lunes).
Samtang special non-working days ang Black Saturday, Marso 30; Ninoy Aquino Day, Agosto 21 (Miyerkules); All Saints Day, Nobyembre 1 (Biyernes).
Special non-working days usab ang Nobyembre 2, (Sabado); Disyembre 24, (Martes); ug Disyembre 31 (Martes).
Special holiday alang sa mga tunghaan lamang ang anibersaryo sa EDSA Revolution sa Pebrero 25 (Martes).
Giingong holiday usab ang Eid’l Fitr ug Eidul Adha apan i-anunsiyo na lamang kun kanus-a kini base na usab sa Islamic calendar. (PIA-Bohol/ECB/P-gg)
DOH: Sin tax bill, usa ka ‘anti-cancer’ bill
TAGBILARAN CITY, Bohol, Sept. 03 (PIA)–Nanghinaot ang Department of Health (DOH) nga mahimo nang balaod sa mas daling panahon ang “Sin Tax” bill, nga gikonsiderar nilang “Anti-Cancer bill.”
Matud pa ni DOH Usec. Teodoro Herbosa, ang Substitute Excise Tax and Reform Bill o mas gi-ila nga ‘Sin Tax’ bill nagtinguha nga maalimahan ang maayong panglawas sa mga Pinoy.
Giingong malikayan ang pagbaton og mga sakit sama sa lung cancer mao nga gisuportahan sa ilang ahensya ang maong balaodnon
Giseguro usab ni Herbosa nga dili kini angay ikabalaka sa mga mag-uuma og tabako tungod kay ang kitaon gikan sa taripa niini igahin man alang kanila.
Gawas sa pag-alima sa maayong panglawas, makadaginot usab ang gobyerno sa higayong mahimo nang balaod ang “Sin tax” bill tungod kay mokabat man sa P188 bilyon matag tuig ang galastohan sa gobyerno sa pagpatambal sa mga katawhan nga adunay sakit tungod sa pagpanigarilyo.
Gibutyag usab ni Herbosa nga migawas sa mga pagtuon nga pinakadaghang kabus nga Pilipino ang tigpanigarilyo ug kadaghanan niini nagsugod sa 13 hangtud 15-anyos. (PIA-Bohol/ECB/I-hd)
