TAGBILARAN CITY, Bohol, Nov. 27 (PIA)–Naa sa 100 hangtud 120 ka mga partylist group lamang ang tugotan sa Comelec nga makaapil sa 2013 midterm elections.
Matud pa ni Comelec Chairman Sixto Brillantes, target nilang mahuman ang deliberasyon ug botohan sa mga partylist group sa dili pa matapos ang buwan sa Nobyembre.
Gipasabot ni Brillantes nga kun dili nila kini mahuman, mahimong tiwason nila kini hangtud sa unang semana sa Disyembre.
Giingong kapin 300 na ang ilang na-evaluate diin 172 ka grupo ang ni-apply og akreditasyon samtang ang 184 adunay existing registration na.
Sa maong gidaghanon, kapin sa 80 ka partylist group na ang nadiskwalipika samtang lima usab ang gitogutan nga makaapil sa piniliay. (PIA-Bohol/ecb/I-gg)
Gun ban exemption sa pipila ka gov’t. institutions, gipalapdan sa Comelec
TAGBILARAN CITY, Bohol, Nov. 27 (PIA)–Gipalapdan sa Commission on Elections (Comelec) ang listahan sa mga government institutions nga exempted sa ipatuman nga total gun ban sa buwan sa Enero sa sunod tuig.
Sa 17 ka pahinang resolusyon sa Comelec en banc, na-apil sa listahan nila ang internal security personnel sa bise presidente, DILG secretary ug defense secretary.
Kauban na usab sa resolusyon sa ahensya ang state, regional, provincial ug city prosecutors sa Department of Justice (DoJ), apil na ang internal security personnel sa Bureau of Correction (BuCor) ug Bureau of Treasury.
Matud pa ni Comelec Chairman Sixto Brillantes, angay naka-plantilla position ang mga security personnel, naka-uniporme kun magdala sa pusil ug may saktong permiso kini gikan sa Philippine National Police (PNP). (PIA-Bohol/ecb/I-gg)
