TAGBILARAN CITY, Bohol, Dec. 11 (PIA)–Gilagdaan na kagahapon nilang Department of Transportation and Communications (DOTC) Secretary Joseph Emilio Aguinaldo Abaya ug Department of Trade and Industry (DTI) Secretary Gregory L. Domingo ang DOTC-DTI Joint Administrative Order (JAO) No. 1, Series of 2012 o mas gi-ila sa Air Passenger Bill of Rights.
Gi-aprubahan ang maong kamanduan human ang tulo ka public hearings nga gipahigayon sa duha ka ahensya.
Gitambungan kini sa mga tinugyanan sa pipila ka stakeholders sama sa airline companies, consumer groups ug ubang concerned citizens.
Kauban usab sa public consultations ang pipila ka government units, sama sa Department of Tourism (DOT) ug mga opisina sa ubang senador ug congressman.
Epektibo ang joint order sa Disyembre 21 human ang 10 ka adlaw nga pagpatik niini sa publiko sa mga pahayagan ang kamanduan.
Ubos sa maong kamanduan, obligado na ang mga airline company nga hatagan og compensation ug amenities ang mga pasahero sama sa refreshments o meals, hotel accomodations ug transportasyon paingon ug pagbiya sa tugpahanan.
Sakop usab niini ang pakig-alayon sa oras sa kanselasyon ug delays.
Apil usab sa JAO ang: right to be provided with accurate information; right to receive full value of the service purchased; ug right to compensation in cases of delay, cancellation, and delayed, lost or damaged baggage.
Ubos sa Air Passenger Bill of Rights, magarantiyahan na ang katungod sa mga pasahero batok sa mga giingong makailad nga polisiya ug sumbanan sa mga airline companies.
Alang sa mga detalye sa DOTC-DTI JAO No. 1, Series of 2012, bisitaha lang sa Official Gazette website: http://www.gov.ph ug sa Civil Aeronautics Board website: http://www.cab.gov.ph. (PIA-Bohol/ecb/I-hd)
