TAGBILARAN CITY, Bohol, Jan. 11 (PIA)–Gitakdang kasamtangang hulipan si Provincial Election Supervisor Atty. Eliseo Labaria sa Enero 21, 2013 hangtud matapos ang election period.
Kini tungod sa na-andan na nga reshuffling sa mga Election Supervisor sa dili pa ipahigayon ang eleksyon, pasabot ni Juvenal Beniga, ang tigpamaba sa Commission on Elections (COMELEC) dinhi atol sa Information Sharing sa mga miyembro sa Association of United Development Information Officers in Bohol (AUDIO-Bohol) nga gipahigayon kagahapon sa Casa Rey Pension House & Restaurant.
Matud pa ni Beniga nga ang reshuffling sa mga election officers sa mga kalungsoran ug election supervisor sa mga lalawigan magsugod na unta gahapon, Enero 10, apan gibalhin sa Enero 21 tungod sa hangyo nga i-oktaba una kini aron mahatagan sila og igong panahon aron pagsinati sa ilang bag-ong tahas.
Ang mohulip kang Labaria mao si Cebu Provincial Election Supervisor Atty. Marco Lionel Castillano, samtang giingong sa Siquijor usab kasamtangang ibutang si Labaria.
Samtang hingpit na usab nga ipatuman ang ‘gun ban’ sa nasud sugod sa Enero 13, 2013, isip pagpangandam sa 2013 May elections.
Si Beniga nagkanayon nga ubos sa Comelec gun ban, tanang lisensiya ug Permits to Carry Firearms Outside Residence (PTCFORs) suspendido.
Exempted sa ‘gun ban’ ang Armed Forces of the Philippines chief (AFP), Philippine National Police (PNP), National Bureau of Investigation (NBI), Bureau of Corrections, Bureau of Customs, Bureau of Imigration, Citizen Armed Force Geographical Unit (CAFGU) ug Presidential Security Group nga naka-uniporme ug naka-duty.
Dungan sa pagpatuman sa gun ban sa Enero 13, gipaabot nga daghang kapolisan ang ipakatap ug hingosgan usab ang mga checkpoints sa Philippine National Police (PNP).
Mopahigayon pa hinuon og meeting ang COMELEC kauban ang AFP ug PNP sa Enero 12 didto sa kaulohan, matud pa ni Beniga. (PIA-Bohol/ecb/I-sjp)
