TAGBILARAN CITY, Bohol, Jan. 15 (PIA)–Gitakda sa Pebrero 17-23, 2013 ang labing dakung surgical mission ning tuiga dinhi sa lalawigan sa Bohol.
Kini pagadumalaon sa 30-man surgical team gikan sa Association of Filipino Physicians of Southern Illinois (AFPSI) nga pangunahan ni Dr. Renato Rivera.
Ang US surgical team moabot dinhi sa Pebrero 16 sakay sa Philippine Airlines (PAL).
Ang mga miyembro sa maong surgical team naglangkob sa mga ekspertong American surgeons, experienced nurses gikan sa Southern Illinois ug ubang doktor gikan sa West Virginia, Arizona, Philadelphia, New Jersey, Florida ug California nga pangunahan ni Dr. Antonio Daquipa.
Ipahigayon ang surgical mission sa Borja Family Hospital pinaagi sa medical director niini nga si Dr. Melinda Borja ug chief of clinic, Dr. Kazan Baluyot.
Apil sa mga surgical cases nga ipahigayon mao ang thyroidectomy, hysterectomy, oophorectomy, breast tumor, hernia, gallbladder ug cleft lip palate, ug uban pang major operations.
Ang mga pasyente niini maggikan sa 47 ka lungsod sa lalawigan sa Bohol ug sa syudad sa Tagbilaran.
Gitambagan ang publiko nga bisitaha lang ang buhatan ni Dr. Fancy Baluyot sa ubos ug likod nga bahin sa Provincial Capitol o tawag lamang sa (038) 501-9196 alang sa ubang detalye ug pangutana, samtang nagpadayon pa ang pagpa-lista ug pre-screening sa mga pasyente.
Gitambagan ang mga pasyente sa pagbisita una sa ilang municipal health officers alang sa proper referral sa mga pasyente sa kalungsoran.
Kining labing dakung surgical mission gi-sponsoran sa Kagamhanang Probinsiyal ubos sa pagdumala ni Gob. Edgar Chatto ug Vice-Gob. Concepcion Lim ug pinaagi usab sa Sangguniang Panlalawigan health committee chair Board Member Cesar Tomas Lopez, Provincial Administrator Alfonfo Damalerio II ug sa Philippine Gift of Life Foundation pinaagi sa chairman niini nga si Dr. Ramie Cadag ug President/CEO, Dr. Fancy Baluyot. (PIA-Bohol/ecb)
