TAGBILARAN CITY, Bohol, Feb. 18 (PIA)–GIPAGAWAS sa Department of Education (DepEd) ang DepEd Order Number 9 Series of 2013 sa tanang pampublikong tunghaan sa tibuok nasud agig pagpahinumdom nga bawal maningil og bisan unsang graduation fee.
Kini nagpasabot nga dili mahimong mangolekta ang school administrator, mga magtutudlo ug non-teaching personnel og bisan unsang kontribusyon alang niini.
Apan mahimong mohatag og donasyon in cash o in kind ang Parents-Teachers Association (PTA) nga gamiton alang sa commencement exercises.
Bawal magpahimo og mga non-academic projects aron lang makatapos ang usa ka estudyante.
Dili angay obligahon ang mga motapos nga magsul-ob og mga nindot nga saput ug kun mahimo, uniporme na lang.
Bawal usab ipahigayon ang seremonya sa usa ka espesyal o mahal nga venue.
Kun adunay yearbook, kinahanglang voluntary basis ang kontribusyon alang niini.
Angay lamang nga tinuoray, disiplinado ug memorable ang graduation rites alang sa mga estudyante ug ilang ginikanan apan dili kinahanglang bongga o mahal.
Og labi sa tanan, bawal gamiton sa mga kandidato ang graduation rites alang sa ilang pagpangampanya. (PIA-Bohol/ecb/p-hd)
