TAGBILARAN CITY, Bohol, Feb. 19 (PIA)–GISUGDAN na karong adlawa sa Commission on Elections (Comelec) ang pagpadala sa kopya sa ballot image sa ilang mga buhatan sa tibuok Pilipinas, partikular na sa mga lagyong probinsya.
Gituyo kini aron mahimong pamilyar ang publiko sa mahimong hitsura sa balotang gamiton sa May 13, 2013 midterm elections.
Nahisulod sa kasamtangang ballot sheet ang 33 ka senatorial candidates, 136 ka partylist groups ug mga local nga kandidato.
Bisan ang numero sa ilang mga gustong ibotar nga kandidato, mahimo na nilang timan-an aron dali nalang sa actual voting.
Kahinumdoman nga niadtong 2010 presidential elections, daghan ang nagkaguliyang sa pagbotar tungod kay niadtong adlawa lamang nila nakita ang hitsura sa balotang gamiton. (PIA-Bohol/ecb/i-gg)
Honorarium sa mga magtutudlo, ihatag dayon sa Comelec
TAGBILARAN CITY, Bohol, Feb. 19 (PIA)–MADAWAT na dayon sa mga magtutudlo nga mo-alagad isip board of election inspectors (BEIs) sa nagsingabot nga piniliay ang ilang honorarium.
Matud pa ni Comelec Chairman Sixto Brillantes, Jr., pagkahuman sa trabaho sa mga magtutudlo human sa piniliay, ihatag nila dayon ang bayad pinaagi sa cash cards o mahimo usab nilang i-withdraw sa mga ATM outlets.
Kaniadto, cash ang ginabayad sa Comelec sa mga BEIs nga gina-distribute sa election officers diin may mga insidente nga giingong nangawala mao nga walay nakaabot sa mga magtutudlo.
Nakig-alayon na ang Comelec sa Land Bank of the Philippines alang sa usa ka memorandum of agreement diin didto e-deposito ang kwarta.
Adunay 240,000 ka mga magtutudlo nga mo-alagad sa piniliay sa Mayo 13 ug matag usa nila makadawat og P4,000 allowance alang sa ilang poll duties.
Gibansaybansay na sa Comelec ang mga trainor nga maoy ipakatap sa tibuok nasud aron mao usan ang mobansay sa mga magtutudlo.
Bansayon usab ang mga BEIs sa teknikal nga aspeto sa piniliay aron masiguro nga bisan usa man lamang sa tulo ka magtutudlo nga ibutang sa may 77, 829 clustered precincts, adunay teknikal nga kahibalo sa mga PCOS machines.
Sugdan na usab sa Comelec ang ilang voters education sa unang semana sa Marso. (PIA-Bohol/ecb/i-hd)
