TAGBILARAN CITY, Bohol, Feb. 25 (PIA)–Gilagdaan na ni Presidente Benigno “Noynoy” Aquino III ang gipaabot nga Human Rights Victims Reparation and Recognition Act of 2013.
Kini ang nahimong highlight sa selebrasyon sa 27th EDSA People Power Revolution sa People Power Monument, Quezon City.
Gitambongan sa kapin 100 ka biktima sa Martial Law nga giapilan sa kanhi human rights victim ug karon Commission on Human Rights (CHR) Chairperson Etta Rosales ang paglagda sa bag-ong balaod.
Ubos sa maong balaod, gamiton ang P10 bilyong pondo gikan sa giingong gikawat nga bahandi sa mga Marcos isip pangbayad sa mga biktima. Nakapatik usab sa balaod ang pagtukod og Human Rights Violations Victims’ Memorial Commission.
Gawas pa niini, isip pag-ila sa ilang mga kasinatian, itudlo na usab sa mga eskwelahan ang mga pagpanglapas ug pag-abusong natala batok sa tawhanong katungod sa mga human rights victims niadtong diktaduryang Marcos.
Gisugdan ang ika-27 nga anibersaryo sa EDSA People Power Revolution karong adlawa pinaagi sa usa ka flag-raising ceremony nga gipangunahan ni Presidente Aquino ganinang alas-7:50 sa buntag.
Gitambongan kini sa mga gi-ilang personalidad sa People Power Revolution niadtong Pebrero 25, 1986. (PIA-Bohol/ecb/i-hd)
BIR, nagsugod nag-monitor sa campaign spending
TAGBILARAN CITY, Bohol, Feb. 25 (PIA)–Katambayayong na karon sa Commission on Elections (Comelec) ang Bureau of Internal Revenue (BIR) sa pagmonitor sa mga gastos sa kampanya sa mga politiko.
Kini human nipagawas ang BIR og memorandum circular nga nag-obligar sa mga national ug local candidates apil na ang ilang political parties nga mo-sumiter og mga resibo sa matag kontribusyon nga ilang madawat.
Lahi usab kini sa ipadala sa BIR nga mga nagastos sa kinatibuk-ang panahon nga 90 ka adlaw nga kampanya.
Matud pa ni BIR Commissioner Kim Henares, unahon nilang imbestigahan ang mga dili mosunod sa memorandum circular, samtang ipahigayon dayon nila ang pag-review sa mga mo-sumiter og report.
Nagtuo si Henares nga pinaagi niini, masakpan nila ang mga molapas sa campaign spending rule sa Comelec. (PIA-Bohol/ecb/i-gg)
