TAGBILARAN CITY, Bohol, Feb. 26 (PIA)–Magbutang ang Commission on Elections (Comelec) og courtesy lane alang sa mga may kakulian sa panglawas o persons with disabilities (PWD) sa adlaw sa eleksyon.
Matud pa ni Comelec Chairman Sixto Brillantes nga kinahanglang magparehistro sa Comelec ang mga botanteng PWD aron maka-avail sa courtesy lane nga pagabuksan sa ground floor sa mga voting center.
Dili na usab kinahanglan pang mo-linya ang mga PWD aron mobotar.
Kining maong lakang gihimo agig pagtamod sa paglagda ni Presidente Benigno “Noynoy” Aquino III sa balaod nga nagmando sa paghatag og accessibility sa mga PWD sa panahon sa eleksyon.
Si Brillantes nagkanayon nga may resolusyon na sila aron ipatuman kini. (PIA-Bohol/ecb/i-gg)
CHED, nipasidaan sa mga tunghaan kalabot sa field trips
TAGBILARAN CITY, Bohol, Feb. 26 (PIA)–Nipasidaan ang Commission on Higher Education (CHED) batok sa mga eskwelahang pugson ang mga estudyante nga mokuyog sa field trip.
Kini human sa reklamo sa usa ka namatyan sa aksidente sa Tuba, Benguet nga giingong gipugos lang ang iyang asawang nagtungha sa kolehiyo nga mokuyog sa field trip sa Baguio.
Matud pa ni CHED Executive Director Atty. Jun Vitriolo, dili mandatory ang field trip mao nga dili angay pugson ang mga estudyante nga mokuyog niini.
Kun mopahigayan man gani og field trips, bawal usab moadto sa mga lagyong lugar.
Dugang pa ni Vitriolo, “responsibilidad ng paaralan ang safety ng mga estudyante.”
Sa pagkakaron, nimugna na og grupo ang CHED nga motutok sa nahitabong aksidente.
Samtang usa ka magbabalaod usab ang nanawagan sa mga pamunuan sa mga tunghaan nga i-ban na ang pagpugos sa field trip ilabi na sa mga lagyong lugar alang sa kaluwasan sa mga estudyante ug aron dili na usab mogasto pa ang mga ginikanan.
Si Rep. Pedro Romualdo (Lone District, Camiguin) nanawagan niini sa Department of Education (DepEd) ug CHED human sa nahitabong aksidente sa Tuba, Benguet niadtong Huwebes. (PIA-Bohol/ecb/i-hd)
