TAGBILARAN CITY, Bohol, Mar. 12 (PIA)–Giseguro karon ni Presidente Benigno ‘Noynoy’ Aquino III sa mga investors nga dili sila magmahay kun dalhon ang ilang mga negosyo sa Pilipinas.
Gihimo sa Presidente ang maong pahayag sa gipahigayon nga Euromoney-Philippine Investment Forum 2013 sa syudad sa Makati.
Matud pa sa Presidente, namatikdan na karon sa tibuok kalibotan ang mga natalang reporma diin mas milambo pa ang ekonomiya sa nasud.
Masaligon ang Presidente nga magpadayon ang uptrend sa ekonomiya ug pahimoslan gayud ang momentum aron mas molig-on pa kini.
Gitumbok usab sa Presidente nga dili angay ikabalaka kun mas taas ang labor cost sa Pilipinas tungod kay sulit man kini tungod sa kakugi ug kamaayo sa mga trabahanteng Pinoy.
Gi-ila ang mga Pilipino sa kakugi, kamatinud-anon, kaantigo ug kamao ilabi na sa pagsulti sa pinolongang Ingles nga napamatud-an na sa paglambo sa BPO industry sa nasud. (PIA-Bohol/ecb/i-ed)
Mga ospital sa Germany, modawat na og mga Pinoy nurses
TAGBILARAN CITY, Bohol, Mar. 12 (PIA)–Buksan na alang sa mga Filipino nurses ang nasud sa Germany.
Matud pa sa taho sa Department of Foreign Affairs (DFA), nakighinabi na si Philippine Ambassador to Germany Maria Cleofe Natividad sa mga opisyal sa Federal Employment Agency, International Placement Services (ZAV) sa Bonn alang sa deployment sa mga Pinoy nurses ug ang gipaabot nga pagbisita dinhi sa nasud ni German Minister for Labour and Social Affairs Ursula Von der Leyen.
Gitakda nga moabot sa Pilipinas ang Minister for Labour sa Germany aron saksihan ang paglagda sa kasabotan tali sa tinugyanan sa Philippine Overseas Employment Administration (POEA) ug sa maong placement services sa Germany alang sa pagpadala didto og mga Filipino nurses.
Naapil sa kasabotan nga hatagan og igong linguistic ug professional preparation ang mga Pinoy nga gustong maka-trabaho sa mga tambalanan sa Germany.
Samtang tubagon sa nagkalain-laing labour agency didto ang galastohan aron ma-andam ang Filipino nurses ubos sa triple win formula diin magbaton og integration ang mga nurses sa German labour market ug social environment sa maong nasud.
Matud pa sa DFA, ang deployment sa nurses sa Germany apil sa enhanced labour cooperation nga nahisgotan nilang Foreign Affairs Secretary Albert F. del Rosario ug German Foreign Minister Guido Westerwelle sa pagbisita niini sa nasud niadtong Pebrero ning tuiga. (PIA-Bohol/ecb/p-hd)
