TAGBILARAN CITY, Bohol, Mar. 13 (PIA)–Madayon sa sunod semana ang panaghisgot sa kalinaw tali sa gobyerno ug sa Moro Islamic Liberation Front (MILF) bisan sa kagubot karon sa Sabah tali sa puwersa sa Malaysia ug mga sumusunod sa Sultanato sa Sulu.
Wala gibutyag ni MILF chief negotiator Mohagher Iqbal kun kanus-a ang eksaktong adlaw sa panaghisgot apan giingong gitakda kini sa ikatulong semana sa Marso.
“As far as we are concerned, it will resume as scheduled. There is no timeframe (for the completion of the discussions) but we have to fast-track this,” matud pa ni Iqbal.
Giingong ipadayon nila ang panaghisgot kalabot sa normalization apil na usab ang wealth ug power sharing.
Gilagdaan na sa gobyerno ug sa mga negosyador sa MILF ang Annex on Transitional Arrangements and Modalities sa 36th round sa formal exploratory talks nga gipahigayon sa Kuala Lumpur, Malaysia niadtong Pebrero 25 hangtud 27.
Nakalatid sa panaghisgot ang pagtukod og Bangsamoro region nga ihulip sa Autonomous Region in Muslim Mindanao.
Si Iqbal nagkanayon nga walay epekto sa negosasyon ang kasamtangang kagubot karon sa Sabah. (PIA-Bohol/ecb/i-sjp)
Liquor ban, gi-uswag sa Comelec
TAGBILARAN CITY, Bohol, Mar. 13 (PIA)–Gi-uswag sa Commission on Elections (Comelec) ang implementasyon sa liquor ban kalabot sa nagsingabot nga 2013 midterm elections.
Matud pa ni Comelec Chairman Sixto Brillantes, gikan sa kaniadto nga duha ka adlaw lamang nga gi-bawal ang ilimnong makahubog, himuon na nila kining lima ka adlaw.
Imbes nga sa Mayo 12, sugdan ang pagbawal sa pagbaligya ug pagpalit og mga ilimnong makahubog gikan Mayo 9 hangtud Mayo 13.
Karong adlawa gibotaran sa 4-1 sa mga commissioner nga tas-an ang liquor ban.
Tuyo niining malikayan ang mga insidenteng gilambigitan sa mga adunay impluwensya sa ilimnong makahubog sa panahon sa election preparation.
Ang molapas niini, adunay silot gikan usa hangtud unom ka tuig nga pagka-bilanggo.
Gitataw usab sa Comelec nga dili apil o exempted sa ban ang mga DOT-accredited establishments, sama sa mga five star hotels ug uban pang lugar nga pangturismo. (PIA-Bohol/ecb/i-gg)
