TAGBILARAN CITY, Bohol, Mar. 22 (PIA)–Nagpagawas og pay rules ang Department of Labor and Employment (DOLE) alang sa pribadong sektor karong Semana Santa.
Matud pa sa DOLE, kun mo-trabaho ang usa ka empleyado sa Marso 28, Maundy Thursday ug Marso 9 o Good Friday nga mga regular holidays, bayaran siya og 200% sa iyang suweldo alang sa usa ka adlaw sa unang walo ka oras sa trabaho, apil na usab sa iyang COLA.
Kun ang empleyado dili mo-trabaho, bayaran pa gihapon siya og 100% sa iyang suweldo alang sa usa ka adlaw apil na usab sa iyang COLA.
Kun day-off ug mo-trabaho siya og overtime, dugang 30% ang ihatag sa iyang hourly rate sa maong adlaw.
Sa March 30, Black Saturday nga usa ka special non-working day, kun ang empleyado dili mo-trabaho, ipatuman ang “no work, no pay” principle gawas na lamang kun may polisiya ang kompanya o kun adunay nakalatid sa ilang Collective Bargaining Agreement kalabot sa suholan sa special holiday.
Kun mo-trabaho, dugang nga 30% alang sa unang walo ka oras ug kun mag-overtime, bayaran siya og 30% sa iyang hourly rate.
Kun matunong sa rest day ug mo-trabaho pa gihapon, dugang nga 50% sa iyang daily rate alang sa unang walo ka oras ang ipatuman ug kun mag-overtime, bayaran og dugang nga 30% sa iyang hourly rate. (PIA-Bohol/ecb/i-hd)
Reclustering sa mga voting precincts sa 44 ka probinsiya, ipatuman sa Comelec
TAGBILARAN CITY, Bohol, Mar. 22 (PIA)–Ipatuman sa Commission on Elections (Comelec) ang reclustering o kausaban sa mga voting precincts sa 44 ka lalawigan sa nasud.
Base sa Comelec Resolution 9624 ug 9562, ipatuman ang reclustering sa mga mosunod nga probinsya: Abra, Agusan del Norte, Agusan del Sur, Aklan, Antique, Apayao, Basilan, Benguet, Bohol, Bukidnon, Cagayan, Camarines Sur, Capiz, Catanduanes, Cebu, Davao del Sur, Eastern Samar, Ifugao, Ilocos Norte, Ilocos Sur, Iloilo, Isabela, Laguna, Lanao del Sur, ug Leyte
Apil na usab ang Maguindanao, Marinduque, Misamis Occidental, Misamis Oriental, Northern Samar, Occidental Mindoro, Palawan, Quezon, Quirino, Rizal, Romblon, Western Samar, Siquijor, Southern Leyte, Sultan Kudarat, Sulu, Tawi-tawi, Zamboanga del Norte ug Zamboanga del Sur.
Nagdesisyon ang Comelec nga usahon na lang ang ubang presinto tungod sa kagamay sa mga botante sa ubang lugar. Makadawat og usa ka PCOS machine ang usa ka clustered precinct.
Masaligon si Comelec chairman Sixto Brillantes nga may igo pang panahon aron ipahibalo sa mga botante ang gihimong reclustering. Mahimong i-double check sa website sa Comelec ang mga precinct assignments. (PIA-Bohol/ecb/i-gg)
