TAGBILARAN CITY, Bohol, April 08 (PIA)–Gi-aghat sa Department of Labor and Employment (DOLE) ang mga ilegal ug dili dokumentadong overseas Filipino workers (OFWs) sa Saudi Arabia nga tarongon na ang ilang mga dokumento karong gihunong ang crackdown operations sa illegal migrants didto.
Matud pa ni DOLE Secretary Rosalinda Baldoz, maayong higayon ang gi-anunsyong tulo ka buwan nga lugway sa hari sa Saudi sa paggukod sa mga illegal workers aron tarungon sa mga Pinoy ang ilang mga papeles.
Gitambagan usab ni Baldoz ang mga overstaying na sa Saudi nga posibleng nagkaproblema na sa papeles nga lihukon na usab ang ilang mga dokumento.
Kini human sa pasidaan nga sikopon ug ipa-deport ang mga ilegal nga trabahante sa Saudi ubos sa Saudization program niini nga nagtinguhang dugangan ang gidaghanon sa Saudi nationals nga maapil sa workforce niini partikular sa pribadong sector.
Sa pagkakaron, 10-porsyento lamang sa workforce sa nasud ang Saudi nationals diin mogawas nga sa matag 10 ka Saudis nga nagtrabaho, siyam niini ang naa sa public sector.
Gipahayag ni Baldoz nga sa pagkakaron, dili pa siya sigurado sa eksaktong gidaghanon sa mga dili dokumentadong Pinoy sa Saudi ug giingong ang Department of Foreign Affairs (DFA) ang posibleng may gigunitang rekord niini. (PIA-Bohol/ecb/i-hd)
