TAGBILARAN CITY, Bohol, April 10 (PIA)–Gipasidunggan ni Presidente Benigno “Noynoy” Aquino III ang mga beterano sa giyera pinaagi sa pagpadayag sa mga dugang benepisyo sa pagsaulog sa ika-71 nga anibersaryo sa Araw ng Kagitingan.
“Ngayong Araw ng Kagitingan, isang bansa muli tayong nagtitipon sa makasaysayang pook na ito upang magbaliktanaw at bigyang pugay ang kabayanihan ng mga beteranong Pilipino at Amerikano ng ikalawang digmaang pandaigdig,” pahayag ni PNoy.
Nagtuo ang Presidente nga dili igo ang mga paghalad lamang og bulak ug ang paghatag og magarbong selebrasyon isip pagdayeg sa mga beterano sa World War II.
Gawas sa padayon nga pagtutok sa Philippine Veterans Affairs Office (PVAO), apil sa dugang benepisyo alang sa mga beterano ang total administrative disability pensions diin gawas sa uban pang benepisyo, makadawat og P1,700 matag buwan ang beteranong may edad 70 anyos pasaka.
Nakatutok na usab sa pagpatuman sa Filipino Veterans Equity Compensation Law nga maoy nagsiguro sa pagdawat sa kompensasyon sa mga non-US citizen nga giingong mokabat sa $9,000 ug $15,000 alang sa US citizens.
Mikabat na sa $224-milyon ang nahatag nga kompensasyon sa 18,700 ka aplikasyong naaprubahan ubos niini.
Sa serbisyong medikal, giingong padayon ang serbisyo sa mga PVAO-accredited hospitals sa tibuok nasud.
Niadtong Enero, epektibo na usab ang P1,200 nga gikan sa kanhi P800 ang daily confinement package sa mga beterano.
Karong tuiga, giingong paningkamotan usab nga mabayran ang P300 bilyon nga utang sa gobyerno sa mga benepisyo sa mga beterano. (PIA-Bohol/ecb/i-gg)
