TAGBILARAN CITY, Bohol, May 15 (PIA)–Gilagdaan na ni Presidente Benigno Aquino III ganinang buntag, Miyerkules ang balaod nga magdugang og duha pa ka tuig sa basic education sa Pilipinas.
Ubos sa Republic Act 10533, ipatuman na ang “K to 12 program” sa gobyerno, nga gisugdan na sa Department of Education (DepEd) sa mga tunghaan sa tibuok nasud sa niaging tuig.
Sa bag-ong balaod, mabag-o na ang basic education program sa nasud – usa ka tuig sa Kindergarten, unom ka tuig sa primary school, upat ka tuig sa junior high school ug duha ka tuig sa senior high school.
Apil usab niini ang pagpatuman sa mother-tongue-based multilingual education program o ang paggamit sa naandang pinulongan sa pagtudlo sa mga estudyante gikan Kinder hangtud Grade 3.
Matud pa ni Presidente Aquino, mas mapalalom sa K-12 ang kinaadman sa mga estudyante aron makig-dungan sa graduate sa ubang nasud.
Dugang pa sa Presidente nga dili na mabiyaan ang mga Pilipinong estudyante tungod kay pagatotokan niini ang pagpalambo sa kaalam sa Filipino, Ingles, Math ug Science.
Dungan niini, gipasigarbo usab sa Presidente nga sa pagsulod sa school year, wala nay backlog sa mga lawak-tunghaan ug giingong mapapas na usab ang kakulang sa mga libro ug lingkoranan sa mga tunghaan.
“Sa pagsasabatas ng K-12, hindi lang tayo magdaragdag ng dalawang taon para sa pagsasanay ng ating mga mag-aaral, titiyakin natin na talagang nabibigyang-lakas ang susunod na henerasyon na maki-ambag sa pagpapalago ng ating ekonomiya at lipunan.” matud pa ni Presidente Aquino. (PIA-Bohol/ecb/i-gg)
