TAGBILARAN CITY, Bohol, June 28 (PIA)–Angay seryosohon sa publiko ang pagpatuman sa 4 o’clock habit program aron malikayan ang posibilidad sa dengue storm sa nasud.
Ubos sa maong programa, ang publiko ug mga lider sa lokal nga kagamhanan gi-aghat nga magtinabangay sa pagpahigayon og halapad nga pagpanglimpyo sa palibot ug mga panimalay aron mapakgang ang mga posibleng breeding sites sa mga lamok.
Gipasabot ni Health Assistant Secretary Dr. Eric Tayag nga kun dili magtinabangay ang tanan, dili imposible ang dengue storm sa nasud ilabi na kun may bag-ong strain sa dengue nga mahimong predominant karong tuig.
Sa dengue storm, giingong mas daghang katawhan ang nameligro nga magka-dengue virus kun mokatap ang Type 2 o Type 4 strains.
Sa niaging tuig, ang predominant strains mao ang Type 1 ug Type 3, mao nga kun mahimong predominant ang Type 2 strain karong tuig, mahimong adunay mas grabeng kaso sa dengue.
Ang Type 2 strain mao ang most virulent strain sa dengue kun itandi sa Types 1, 3 ug 4. Samtang ang Types 1 ug 3 ang nahimong most common nga dengue strains sa nilabay nga tulo ka tuig.
Dinhi sa lalawigan sa Bohol, subling gilusad kagahapon sa mga kadagkuan sa Provincial Health Office ug sa kagamhanang probinsyal sa Bohol ang kampanya batok sa pagsumpo sa dengue.
“Hunong sa imong gimbuhaton matag alas 4:00 sa palis, pangitaa ang mga itloganan sa lamok ug iyabo kini, pamati sa imong mga opisyales sa barangay aron hibaw-an ang mga katikaran sa programa pagsumpo sa lamok” tambag ni Provincial Health Officer Dr. Reymoses Cabagnot.
Gibutyag ni Cabagnot nga gikan sa buwan sa Enero hangtud ning buwana, nikabat na sa 771 ka kaso sa dengue ang natala sa ilang buhatan ug 6 na ang gikataho nga namatay.
Gitahasan na usab ang tagsa-tagsa ka mga lokal nga kagamhanan nga maoy mangulo sa kampanya alang sa pagsumpo sa dengue pinaagi sa pagguba sa mga dapit nga posibleng breeding sites sa mga lamok.
Ning tuiga, gisagop sa nasud ang Stop, Look and Listen, ABKD Palig-onon. (PIA-Bohol/ecb)
