TAGBILARAN CITY, Bohol, July 04 (PIA)–Subling nanawagan ang Palasyo sa mga Pilipinong nagtrabaho sa ubang nasud nga dili gayud magpagamit isip drug mules o magdala og iligal nga droga sa mga sindikato.
Taliwala kini sa kompirmasyon sa Department of Foreign Affairs (DFA) nga nadayon gayud ang pagbitay kagahapon sa 35-anyos nga Pilipina human nasakpang nagpayuhot og pila ka kilong heroin sa China niadtong 2011.
Matud pa ni Deputy Presidential Spokesperson Abigail Valte, nanghinaot ang Palasyo nga kakuhaan kini og leksyon sa mga Pilipino.
Nanawagan ang Palasyo nga dili magpabiktima sa mga sindikato sa droga ug likayan gayud ang mga ingon niining sitwasyon.
Gipahinomdom ni Valte nga kun mahitabo man kini sa OFW, mas magpabug-at pa hinuon kini sa kahimtang sa ilang mga pamilya imbes nga magpaginhawa sa ilang kinabuhi.
“Umaasa kaming kapulutan ng aral ng ating mga kababayan para hindi magpabiktima sa mga drug syndicate at iwasan ang mga ganitong sitwasyon, na kung sakali man ay mas magpapabigat sa kalagayan ng kanilang mga mahal imbes na magpaginhawa ng buhay,” matud pa ni Valte.
Kalabot niini, gisugyot ni OFW Representative Roy Seneres nga magbutang sa mga airports ug travel documents nga pasidaan kalabot sa mga gibitay nga Pilipinong drug mule.
Si Valte nagkanayon nga gitugyan na sa Palasyo sa DFA ang maong sugyot sa magbabalaod. (PIA-Bohol/ecb)
