TAGBILARAN CITY, Bohol, July 18 (PIA)–Gipahibalo sa Department of Health (DOH) ang pag-apil na sa anti-pneumonia vaccine sa libreng bakuna nga makuha sa publiko sa mga health center isip parte sa immunization program sa buhatan alang sa mga bata.
Matud pa ni Health Secretary Enrique Ona, ang pneumonia ang ikaduhang hinungdan sa sayong kamatayon sa mga bata base sa 2010 statistics diin may natalang 2,628 nga namatay mao nga gi-apil na kini sa libreng bakuna.
“We are introducing the Pneumococcal Conjugate Vaccine (PCV) to the Philippine vaccination program for infants.
This is part of our goal to achieve better health outcomes and meet our health-related Millennium Development Goals by strengthening existing public health programs, such as expanding immunization interventions,” matud pa ni Ona.
Si Ona nagkanayon nga dili kasagaran mahatagan og PCV ang mga bata tungod na usab kay mahal man kini nga mokabat ngadto sa P2,050 matag bakuna samtang mogasto usab og P23,500 ang matag ginikanan kun magkasakit og pneumonia ang ilang mga anak mao nga daku kaayong tabang nga mahatagan dayon og bakuna batok sa sakit ang mga bata.
Gipasabot sa DOH nga unahon sa paghatag og libreng PCV ang taga Autonomous Region in Muslim Mindanao ug Caraga nga may pinakadaghang kaso sa pneumonia.
Gibanabanang naa sa 333,000 ka masuso nga may edad 0 hangtud 11 ka buwan ang mahatagan og libreng bakuna sa maong rehiyon ug isunod ang ubang mga rehiyon diin giingong target sa ahensya nga mabakunahan ang 2.4 milyong bata sa tibuok nasud. (PIA-Bohol/ecb)
Mga Pinoy sa Saudi, gipasidan-an sa mga pekeng marriage certificate
TAGBILARAN CITY, Bohol, July 18 (PIA)–Hugot nga gipasidan-an sa Philippine Embassy ang mga Pinoy sa Saudi Arabia kalabot sa paggamit og pekeng marriage certificate ug uban pang mga dokumento.
Matud pa sa embahada, daghang inahan nga may mga undocumented nga anak ang wala ma-repatriate ubos sa grace period nga gi-uswag hangtud Nobyembre 3 sa gobyerno sa Saudi Arabia tungod kay walay birth certificate nga gi-isyu ang embahada.
Giingong wala itugot sa embahada ang pagpa-meke og dokumento ug kun may masakpan sila, dili kini magduha-duhang isumbong sa mga pulis.
Gikinahanglan ang birth certificate sa pag-isyu og exit visa sa Saudi passport department.
Apan wala iparehistro sa embahada ang ubang mga bata tungod kay bunga man kini sa bawal nga pakig-relasyon. (PIA-Bohol/ecb)
