TAGBILARAN CITY, Bohol, Aug. 05 (PIA)–Gitakdang mopalit ang Pilipinas og second-hand French Navy vessel aron mas hingosgan pa ang pwersa niini taliwala sa tension sa West Philippine Sea.
Matud pa sa Philippine Coast Guard (PCG), posibleng moabot sa nasud ang “La Tapageuse” sa Abril 2014 ug nagkantidad kini og 6 milyon Euro o mga P360 milyon.
Gi-inspeksyon na usab kini sa PCG ug napamatud-ang naa pa sa maayong kondisyon ang patrol ship nga mahimong magamit sa mosunod nga 20 ka tuig.
“This French vessel is multi-functional and it would be a major contribution to our fleet particularly in our search and rescue operations” matud pa ni PCG Chief Rear Admiral Rodolfo Isorena.
Gi-andam na usab sa Pilipinas ug France ang pagpalit usab og usa ka 82-metrong multi-purpose vessel ug upat ka 24-metrong vessel nga gipaabot nga moabot sa nasud sa 2015.
May moabot na usab nga 10 multi-role patrol boats sa tabang na usab sa Japan.
Ang pagpahibalo niini human na usab sa pag-abot sa BRP-Ramon Alcaraz sa nasud, ang ikaduhang second-hand Hamilton-class cutter sa Philippine Navy gikan sa Estados Unidos ug gipaabot nga maoy magpatrolya sa mga teritoryo sa Pilipinas. (PIA-Bohol/ecb)
