TAGBILARAN CITY, Bohol, Aug. 16 (PIA)–Gi-uswag na usab sa Bureau of Internal Revenue (BIR) ang gitakdang deadline alang sa mga negosyante kalabot sa paggamit sa bag-ong resibo.
Ubos sa bag-ong BIR Circular 52-2013, nakalatid nga mahimo pang magamit sa mga business establishments ang ilang mga daang resibo hangtud Oktubre 31, kini gikan sa kanhing Agosto 30 nga deadline.
Pasabot ni BIR Chief Kim Jacinto-Henares, kini aron mahatagan og igong panahon ang mga negosyante nga makapa-printa og bag-ong receipt form.
Gitumbok ni Henares nga adunay kapin sa 2,000 ka accredited printers ang BIR sa tibuok nasud nga mahimong adtuon sa mga negosyante.
Kahinumdoman nga sa gipagawas nga BIR regulations, ang mga daang resibo magamit na lamang hangtud Hunyo 30 ug gi-uswag kini hangtud sa buwan sa Agusto. (PIA-Bohol/ecb)
Total deployment ban sa Egypt, gimando na
TAGBILARAN CITY, Bohol, Aug. 16 (PIA)–Nagpatuman na og “total deployment ban” ang Philippine Overseas Employment Administration (POEA) alang sa mga overseas Filipino workers (OFWs) nga moadto unta sa nasud sa Egypt.
Sa gipagawas nga POEA’s Governing Board Resolution No. 9 Series of 2013, nalakip niini ang processing ug deployment sa tanang mga trabahanteng Pinoy sa maong nasud tungod na usab sa hulga sa seguridad.
Gawas niini, dili na usab tugotang makabalik pa sa Egypt ang mga Pinoy nga daan nang nagtrabaho didto ug bisan ang mga asawa sa mga Egyptian nationals nga naka-bakasyon lamang sa Pilipinas.
“It is not safe for OFWs to go to Egypt and work there, considering the present circumstances,” matud pa ni Labor Sec. Rosalinda Baldoz.
Kahimundoman nga niadtong Hulyo 12, nipagawas ang POEA og “temporary suspension” sa processing ug deployment sa mga newly-hired OFWs paingon sa Egypt.
Taliwala sa nagka-grabeng kagubot sa nasud sa Egypt, giseguro karon sa Philippine Embassy sa Cairo nga walay Pinoy nga naangol o nadamay sa kagubot didto.
Bisan pa niini, subling gipahinumdoman sa embahada ang mga Pinoy nga kun mahimo, magpabilin lamang sa mga luwas nga lugar ug layo sa mga kagubot. (PIA-Bohol/ecb)
