TAGBILARAN CITY, Bohol, Aug. 29 (PIA)–Gipasidan-an sa Philippine Drug Enforcement Agency (PDEA) ang mga establisyemento nga ihunong na ang paggamit sa opium poppy seeds sa ilang menu ug ubang produktong gibaligya sa publiko.
Kini isip suporta sa lakang sa Food and Drug Administration (FDA) human matino nga sa pipila ka mga supermarket ug groceries, may gibaligya pa gihapong sikat nga food dressing ug dip product nga adunay opium poppy seeds.
Ang Opium Poppy o bisan unsang parte sa tanom nga naggikan sa species Papaver somniferum L.; Papaver setigerum DC, Papaver orientale, Papaver bracieatum ug Papaver rhoeas, nalakip sa 1961 United Nations Single Convention on Narcotic Drugs nga gi-amyendahan sa 1972 protocol.
Matud pa ni PDEA Director General Undersecretary Arturo G. Cacdac Jr. nga niadtong una, ang poppy seeds gigamit isip active palliative ingredient sa paghimo og pastries, salads ug uban pang sangkap sa paghimo og cake. Kini ang nahimong dalan nga misaka ang panginahanglan sa maong kuyaw nga droga nga gigamit isip ingredient sa pagluto, partikular sa salad dips ug dressings.
Base sa Section 4, Article II sa Republic Act 9165, nakalatid nga adunay silot sa pag-import sa maong kuyaw nga tambal o Controlled Precursors ug Essential Chemicals nga pagkabilanggo sa tibuok kinabuhi ug piyansang P500,000.00 hangtud P10,000,000.00, apil ang bisan unsang mga species sa opium poppy o parte niini nga gigamit isip dekorasyon ug pagluto.
Gitambagan sa PDEA ang publiko nga i-surrender ang bisan unsang produkto nga adunay poppy seeds sa pinakaduol nga PDEA o FDA regional offices. (PIA-Bohol/ecb)
