TAGBILARAN CITY, Bohol, Sept. 2 (PIA)–Mahinungdanon alang sa gobyerno ang desisyon sa France sa pagpapas sa Pilipinas sa listahan sa mga ‘non-cooperative states’ kalabot sa gipahigayong imbestigasyon sa mga kaso sa foreign aid fraud.
Matud pa ni Department of Finance Secretary Cesar Purisima, ang pagkatangtang sa nasud sa maong listahan maoy bunga sa padayon nga repormang gipatuman sa administrasyon batok sa mga anomaliya ug tax evasion.
Sa bag-ong listahan sa France, wala na naapil ang Pilipinas sa mga nasud nga gidid-an sa paggamit sa French banks isip “source” sa ilang mga development funds.
Apil sa listahan sa mga blacklist ang mga nasud nga walay gihimong aksyon batok sa mga kaso sa foreign aid fraud sama sa Bermuda, British Virgin Islands, Botswana, Brunei, Guatemala, Marshall Islands, Montserrat, Nauru ug Niue. (PIA-Bohol/ecb)
Garlic ug onion growers, magpatabang kang PNoy batok smuggling
TAGBILARAN CITY, Bohol, Sept. 2 (PIA)–Mismong kang Presidente Benigno ‘Noynoy’ Aquino III na moduol ang mga onion ug garlic growers sa nasud tungod sa giingong padayon nga pagsulod sa mga smuggled nga ahos ug sibuyas sa nasud.
Sa panagpulong nga gipatawag sa pangulo sa Sibuyas ng Pilipino Ating Alagaan (SIPAG) nga si Francisco U. Collado sa kaulohan nga gitambungan sa kapin 100 ka mag-uuma ug onion growers, gihangyo niini nga ipahunong na ni PNoy sa Department of Agriculture (DA) ang paghatag og import permit sa usa ka grupo nga giingong usa ka sindikato.
“Ang pagbaha ng imported na sibuyas at bawang sa bansa ay pumapatay sa aming kabuhayan dahil bagsak ang presyo ng mga sibuyas at bawang galing China at Vietnam o karatig bansa. Kaya kay Pangulong Aquino na namin dadalhin ang isyung ito dahil tiyak na kikilos ito para na rin sa kapakanan naming maliliit”, pasabot ni Collado.
Una nang nataho nga giingong usa ka grupo lamang nga gipangulohan sa gi-ila nga usa ka Leah Cruz ang nahatagan og import permit (IP) sa Bureau of Plants Industry (BPI) ug DA alang sa sibuyas ug ahos nga gatusan ka container kun ipasulod sa nasud matag buwan.
Giingong dugay nang gi-reklamo sa grupo kang Sec. Proceso Alcala kining maong problema apan pakyas kini sa pag-aksyun. (PIA-Bohol/ecb)
