TAGBILARAN CITY, Bohol, Sept. 4 (PIA)–Gipahibalo sa Office of the Ombudsman nga modawat na usab sila og online complaints gawas sa regular nga pagdawat og reklamo gikan sa mga sulat ug personal nga pagbisita sa mga petitioners sa ilang opisina.
Tuyo niining mahatagan og kahigayunan ang netizens o internet users nga makatabang sa pagpangita sa mga baglongon nga kawani sa gobyerno.
Apan giingong mo-agi kini sa makuting berepikasyon aron masiguro nga dili lamang pagpang-daut ang mga impormasyong ilang pagagunitan.
Gi-angkon ni Ombudsman Conchita Carpio-Morales nga siguradong modaghan pa gayud ang masuko niya tungod sa hugot nga pagpangita nila sa mga nalambigit sa nagkalain-laing kontrobersya sa mga ahensya sa gobyerno.
Alang sa mga netizens o internet users nga adunay ipadangat nga reklamo batok sa mga badlongon nga kawani sa gobyerno, bisitaha lang ang www.ombudsman.gov.ph ug e-click ang online filing sa ibabaw ug tuo nga bahin sa maong homepage. (PIA-Bohol/ecb)
