TAGBILARAN CITY, Bohol, Sept. 4 (PIA)–Plano sa Bureau of Internal Revenue (BIR) nga manduan na ang mga propesyunal sa pagpaskil sa ilang rates sa mga opisina ug klinika.
Matud pa ni BIR Commissioner Kim Henares, parte kini sa ilang kampanya batok sa ubang doktor, abogado ug uban pang propesyunal nga wala magbayad og saktong buwis.
Giingong agig pagsunod usab kini sa mando sa Department of Finance (DOF).
“Kasi maraming nagrereklamo na ‘pag sinisingil ho sila, humihingi kayo ng resibo, tataas ho ‘yan ng 12% minimum dahil dun sa VAT (value added tax)”, pasabot pa ni Henares.
Sa gihikyad nga kamanduan, angay apil na ang VAT sa ipaskil nga singil sa matag serbisyo sa mga propesyunal.
Sa mga abogado, ipaskil ang per hour rate depende sa posisyon. Per hour rate usab ang sa mga accountant.
Ipaskil ang listahan sa rates sa lugar na daling makita sa mga kliyente ug pasyente.
Sigun pa kang Henares, ipagawas nila ang regulasyon kalabot niini sulod sa usa ka buwan ug target sugdan ang implementasyon niini sa 2014 diin adunay tukmang multa sa mga dili mosunod.
Kini ang unang higayon nga i-require ang mga propesyunal nga ipaskil ang ilang mga charges. (PIA-Bohol/ecb)
