TAGBILARAN CITY, Bohol, Sept. 9 (PIA)–Gilagdaan na ni Presidente Benigno ‘Noynoy’ Aquino III ang Republic Act 106 o ang “Toy and Game Safety Labeling Act ng 2013” aron panalipdan ang mga bata sa mga makuyaw nga duwaan.
Ubos niining balaod, giseguro nga panalipdan ang panglawas ug kaluwasan sa mga bata pinaagi sa pagmando nga butangan og special labeling ang mga duwaan.
Gitakda niining bag-ong balaod nga e-klaro og butang kun adunay gisagol nga bisan unsang matang sa toxic, corrosive, makakatol, strong sensitizer, daling mosilaob o magmugna og pressure tungod sa decomposition, init o uban pang paagi ang mga duwaan.
Ubos niining balaod, tanang duwaan nga hinimo man dinhi sa nasud o gawas sa nasud, gi-angkat, gi-regalo, gipanghatag ug gibaligya sa Pilipinas, angay mosunod sa mga sumbanang luwas, pagbutang og label ug tatak nga nahisunod sa Philippine National Standards.
Angay isuwat sa Ingles o sa Pilipino nga klaro aron mabasa ang bisan unsang pahibalo kalabot sa duwaan agig pagsunod sa Republic Act 7394 o ang Consumer Act sa Pilipinas.
Ang molapas niini pahamtangan og multang dili mo-ubos sa P10,000, apan dili molapas sa P50,000 o pagkabilanggo nga dili mo-ubos og tulo ka buwan ug dili usab molapas sa 2 ka tuig, o ang duha ka silot depende sa desisyon sa hukom.
Tanang duwaan nga walay hapsay nga label pagakuhaon sa gobyerno base sa balaod.
Gimanduan ang Department of Health (DoH) sa pagmantala matag ika-unom nga buwan sa listahan sa tanang misbranded o banned hazardous substances nga dili angay ibaligya tungod kay gi-dili ubos niining balaod.
Katambayayong ang Department of Trade and Industry (DTI) sa DOH sa pagpatuman sa mga sumbanan ug regulasyon sa pagpatuman niining bag-ong balaod.
I-apil sa DTI ug DOH sa tinuig nilang budget ang kantidad nga kinahanglan alang sa pagpatuman niining balaod. (PIA-Bohol/ecb)
