TAGBILARAN CITY, Bohol, Sept. 11 (PIA)–Gi-angkon sa Malakanyang nga dakung hagit karon ang paghatag og igong trabaho taliwala sa natalang paglambo sa ekonomiya sa nasud apan ilang gipasalig nga padayon sa pagsulbad ang mga ahensya sa gobyerno sa unemployment sa nasud.
Nahisulod sa mga job advertisements ang daghang mga trabaho o kumpanya nga nanginahanglan og mga empleyado taliwala sa natalang 3 milyon nga gidaghanon sa mga Pinoy nga walay trabaho sa buwan sa Hulyo 2013.
Kini ang gitawag sa Department of Labor and Employment (DOLE), Department of Education (DepEd) ug Technical Education and Skills Development Authority (TESDA) nga “job mismatch” diin gipaabot nga mahatagan og kasulbaran sa gobyerno pinaagi sa programang K to 12 ug pagduso sa mas hingosgan pang TESDA professional training.
Gikumpirmar ni Socio-Economic Planning Secretary Arsenio Balicasan nga kadaghanan sa mga walay trabaho mga kabataan nga kulang ang kahanas ug kasinatian alang sa mga trabaho nga gitanyag sa nagkalain-laing kumpanya.
Matud pa ni Balicasan, mahinongdanon nga matotokan usab sa gobyerno ang manufacturing sector nga maoy nanguna nga nakatala og “job losses”. (PIA-Bohol/ecb)
